卓韻芝：我係鱷魚頭老襯底

破格、我行我素和「乜都夠膽死」，似乎與卓韻芝對等。阿芝曾在手　「釘環」，但釘完後感半身麻痹，要即時除環，認真(火羅)爆！難怪她自嘲屬「鱷魚頭、老襯底」。

我唔算憤世嫉俗嘅人，亦冇刻意破格，只係純粹地瘋狂，做一啲自己認為啱嘅，而外界會話你瘋狂嘅嘢。細個喺學校以賣閃卡起家，賺咗好多錢，嗰時賣閃卡係為咗同其他賣閃卡嘅仔鬥，邊個可以用最多錢賣到嗰疊「楊采妮（閃卡）」，最後我贏咗，我Sell嘢OKo架！

其實細個好多曳嘢，當年識咗班朋友，好多係「板仔」，佢哋狂穿環，有啲淨係喺塊面已經有28個窿。嗰時我哋去穿環舖頭，會同個阿姐講：「我畀一舊水（$100）你，你畀支槍（釘環槍）我哋任玩。」當時我自己打手，打完以為唔痛，一啲事都冇，但當我離開舖頭，屈起隻手時，已經開始痹，係由隻手一路痹到上頸同頭，再行多陣已經半邊身痹晒，全部喺半個鐘頭內發生，反而我啲朋友喺胸口同脷釘環都冇話痛，但我最後忍唔到痛，要即時除咗個環，衰咗！

除咗手釘環，我都有穿鼻環，阿媽知道後好嬲，佢覺得我好曳，但之後佢同我治理傷口，又買埋鼻環畀我，其實我諗我阿媽知我係曳唔落，亦曳唔得去邊。出嚟做嘢之後嘅缺點係遲到，計時間永遠計錯晒，不過依家改善咗。

林夕勸勿再自殺

最搞笑係余迪偉（電台DJ）成日話我點解咁耐都唔死？我係唔怕死，但就唔想死，死只不過係呢個Project停止，有第二啲Project發生。自殺呢樣嘢當然一定唔可以，林夕（填詞人）同我講過：「你自殺咗一次，你唔好再自殺，如果唔係，你就會係藍潔瑛。」當然佢係講笑啦！但我明白佢個寓意。

我係咪癲喪型？我咁睇啦！把口愈瘋狂嘅人，生活愈係規矩；反而有啲人唔聲唔聲，佢哋生活先係超狂放，我係屬於「鱷魚頭、老襯底」。

（明日待續）