Twins飛鷹傍住終極半裸

經歷4年大風大雨的女子組合Twins，終於合體再出廣東碟！為突破性感底線，孖妹半裸上陣影封面，肉帛相見，只靠「飛甩雞毛」力保4點！

由鍾欣桐（阿嬌）及蔡卓妍（阿Sa）組成的Twins，最近再出廣東大碟，加上成軍第11年，為隆重其事，請來日本攝影師間仲宇操刀拍攝新碟封面，封面以鷹為題，大玩視覺上新突破，穿着牛仔褲的阿嬌及阿Sa赤裸上半身，只用鷹遮胸，阿Sa更大晒玉背，阿嬌則晒纖腰，令人睇到嘩嘩嘩！

拒為善事奉獻

Twins昨日舉行新碟發布會，大會以二人去年於頒獎禮的獎座堆砌成蛋糕山，然後由孖妹揭開蛋糕布，揭開序幕，其後大會拉低一張巨型海報，半裸性感封面曝光！她倆解釋鷹代表自由，阿嬌還打趣指封面中羽毛飛來飛去似「飛甩雞毛」！事後，她們表示拍攝時未感尷尬，阿嬌指並非「真胸」上陣，當時用Tupe Top遮胸，阿Sa則說︰「現場有男有女，不過攝影師想放啲，所以最後得攝影師同女助手留守！」阿嬌還披露二人胸對胸擁抱，非常火辣，問到可有被「頂」親？阿Sa即搶答︰「梗係有啦！（邊個頂邊個？）咁梗係我啦！」

阿Sa強調今次封面是「藝術品」，坦言已是性感極限，她笑說︰「唔會再性感，唔會再露肉，呢個係極限！」孖妹自嘲身材不出眾，阿Sa更指不會為慈善而再露︰「如果為慈善，我寧願捐錢囉！全裸就未必，唔想趕客呀！」阿嬌則暗示身材比人輸蝕，亦指防止乳癌廣告亦不會向她招手︰「唔會搵我，冇人會睇，佢哋多數搵Model，因為身材好啲嘛！」

逼男友交獎金

另一邊廂，提到男友陳偉霆（William）日前於公司春茗中抽到1萬元，阿Sa要他交出獎金，並透露當日未諗過即場捐錢：「嗰時見到祖兒話捐，我已縮兩步，不過都係走唔甩！」對於William可能於拍戲時整傷下體，她則不願多談：「唔好講佢工作方面嘅嘢！」不過阿嬌說︰「呢啲一定要保護！」