蔡恩真趕絕Playboy

攻港兩年多的韓國女星蔡恩真（EJ），自爆曾樣貌改造兼「僭建」，加上衣着性感，難怪吸引大批裙下之臣，但她卻語出驚人，直指港男Cheap︰「香港男仔係Playboy，有好多女朋友，經常去派對，真係好Cheap！之前去Clubbing見過一啲男仔身邊圍住大班女仔，之後問佢哋攞電話號碼，攞完一個又一個。」因此，她對港男的追求攻勢統統拒絕︰「曾經有香港男仔問我攞電話號碼，或者送禮物，但我會拒絕，呢啲事實在太多喇！」

抗拒有錢仔

愛情就是矛盾，EJ將港男貶作地底泥，但又想在港找Mr. Right︰「我想融入香港文化，如果畀我揀，寧願男友冇錢亦唔需要靚仔，因為有錢就會有麻煩。語言障礙冇問題，我可以教佢，佢亦可以教我，愛可以改變大家。」不過，她慨嘆要尋找符合條件的港男非常困難︰「冇拍拖嘅男仔都好忙，如果有時間同金錢，就會有好多女仔！」

不過，她深信有港男「出於污泥而不染」︰「我相信仲有好男仔，希望有日可以改變我對佢哋嘅印象同睇法，我會繼續等待。」雖然未遇到心目中的好男人，但她仍對愛情充滿希望︰「我相信緣分，所以唔會放棄同埋怨，冇男友咪繼續工作先，可能我之後嘅男友好好呢！」她還自爆曾在韓國睇相問姻緣，被指感情路上麻煩多多︰「韓國好多人睇相，佢望住我話見到好多男仔，但會有好多麻煩。」

韓男不成熟

EJ言談間對港男諸多挑剔，對港女卻讚不絕口，更視為奮鬥目標︰「香港女仔好獨立，自己賺錢，有啲仲強過男仔，相反韓國女仔嘅夢想就係結婚生仔，組織自己嘅家庭。」談及韓國男仔，她即為港男爭口氣︰「韓國男仔思想比較細個，因為家人幫佢哋安排好晒，唔會遇到咩大問題，太保護佢哋。」

後記：恨到出面

性格開朗的EJ，談及感情觀即滔滔不絕，不斷問小記哪裏有好男仔，又問很多有關港男的問題，她更不時觀看在餐廳內的港男，顯得非常雀躍，完全忘記訪問過後要趕去工作，也許她真的非常渴望愛情滋潤呢！