梁佑嘉玩足全日一舊水有找

樂壇富貴新人梁佑嘉日前殺落銅鑼灣逛街，在名店外得個「睇」字，反而轉戰車仔檔即有收穫，全日消費100蚊有找，經濟又實惠！

曾豪花逾百萬元在無綫賣廣告的梁佑嘉（Abella），入行後一直被形容為「有錢新人」，日前她獨自到銅鑼灣逛街，先到小食檔買雞蛋仔醫肚，再在名貴鐘錶店外邊食邊望了約20分鐘，然後又步往其他名店Window Shopping。其中幾間名店吸引她來回踱步約半小時，左望右望睇新貨，但她最終未有入內選購心頭好。

買20蚊Leggings

離開名店陣後，Abella到附近的平價化妝品店睇特價面膜，再轉戰平價車仔檔滿足購物欲！她看見車仔檔清貨大平賣，即一支箭上前「尋寶」，拿着數對Leggings左拼右拼，考慮了一會後，她扑錘買下一對價值20元的Leggings。雖然車仔檔正減價促銷，但她畀錢時依然口噏噏，未知是否把握最後機會講價！

離開時，Abella見有人募捐即慷慨解囊，然後乘港鐵返家，雖然被途人眼望望，但她未有理會，專心講電話。觀乎她整日的消費不超過100元，未因家境富裕而亂Fing錢，似乎甚懂慳家之道。