Eason阿詩脷疊脷

陳奕迅（Eason）前晚在黃偉文尾場作品展上，跟反串男人的何韻詩演繹《芳華絕代》時脷疊脷激嘴，還摸阿詩胸並作180度旋轉，全場嘩然，難怪Eason女兒康堤在台下睇到O晒嘴！

黃偉文一連六場的作品展於前晚情人節演出尾場，祖兒、彭羚、Eason、黃耀明、吳君如、薛凱琪、梁漢文、盧巧音、陳曉東及楊千嬅等任表演嘉賓，全場爆滿！再度現身的彭羚和千嬅的出現掀起連番高潮，Eason壓軸演出，還跟阿詩演繹已故巨星張國榮（哥哥）和梅艷芳的金曲《芳華絕代》。當年阿梅和哥哥的演出叫人拍案叫絕，Eason和阿梅徒弟阿詩為超越前輩，竟上演情慾版，不但做出坐大髀及摸Pat的熱情動作，還當着逾萬觀眾面前脷叠脷激咀，Eason還向阿詩摸胸，旋轉180度，又將阿詩的頭挨近自己的重要部位，阿詩則跪在Eason下半身游移，動作火辣，全場觀眾叫到拆天，連Eason女兒康堤亦在台下睇到O嘴！

咀完生痱滋

除了Eason和阿詩的激情演出震撼紅館外，祖兒唱《黃色大門》時淚浸紅館，她感觸地說：「衷心多謝黃偉文，佢令我歌曲有好多生命，識到佢好威，佢個腦裝好多嘢，呢啲眼淚一滴一滴好感動。」她謂這六晚帶給她很多回憶，這首歌唱出心裏的暗角位。

演唱會至晚上12時才完騷，但觀眾不肯離去狂喊「安歌」，擾攘一輪才離場。黃偉文率領一班歌手在後台開香檳慶祝，阿詩被問到跟Eason濕吻，她尷尬地說：「佢先o架！呢個構思係佢諗出嚟，我哋冇排過，不過錫完佢之後生痱滋，我蝕底晒！」但Eason卻否認主動：「係佢伸先，我咪唔蝕底，你係咪狼虎之年呀？（向阿詩摸胸？）輕撫啫！我哋想超越梅姐同哥哥，佢哋之前嘅演出太經典。」對於女兒康堤被嚇呆，他說：「囡囡話見到菇菇（阿詩）同Daddy有啲嚇親，早熟啲啫！冇嘢嘅。」

祖兒睇到暈

連祖兒都取笑Eason和阿詩的演出：「我見到佢條脷有白雪雪嘅脷苔，不過佢哋好似摔角，自己睇到暈一暈。（阿詩蝕底？）我又唔係阿詩，為演出無可厚非，佢哋又係專業歌手。」對於林海峰拒讓老婆彭羚復出，祖兒亦贊同，她認為美滿家庭要花時間經營。而網友對Eason和阿詩的濕吻摸胸反應激烈，並留言：「Eason好似好餓咁，可想而知Eason晚晚對住徐濠縈幾辛苦，連阿詩都唔放過。」、「唔知佢幾耐冇畀男人咀過。」、「真係好有搞Gay Feel！」