楊汀叮情迷阿倫公仔碟

在電影《無間道》中，梁朝偉化身黑膠唱片發燒友，細心聆聽留聲機播《被遺忘的時光》，蔡琴的悅耳歌聲至今還縈繞在某些人心頭。對於很多80後來說，黑膠唱片可能已成「古物」，但對收藏家來說卻是無價之寶。不過很多收藏家對黑膠碟的要求，不再是能否播放出繞樑三日的歌曲，而是該唱片到底本身有多罕有、顏色有多齊全。

o靚模始祖Angelababy師妹楊汀叮是黑膠碟狂迷，淘黑膠碟經驗只有數年的她，現時擁有近二百張黑膠碟，而且種類繁多，香港「代表」有譚詠麟、張國榮及李克勤，外國「代表」有麥當娜，電影界「代表」有成龍和E.T.。

《愛情陷阱》千二蚊

汀叮笑言迷上黑膠碟全因遇上五顏六色的譚詠麟：「幾年前，我喺太子某個商場嘅二手唱片舖，見到一隻譚詠麟（阿倫）嘅公仔碟好靚，五顏六色咁，記得嗰隻碟應該係《愛情陷阱》嘅Single（只有一首歌），係我見過最貴嘅黑膠碟。嗰隻碟我到依家都唔捨得買，因為成千二蚊隻，好貴！可能擁有唔到啦，成日都諗住隻公仔碟，就係咁對各式各樣嘅黑膠碟產生咗興趣。」

現時化身黑膠碟專家的汀叮，笑言從前對黑膠碟認識甚淺，更一度誤以為黑膠唱片是清一色黑漆漆。她表示收藏黑膠碟要賭運氣，有時會意外遇上又平又靚的心頭好：「我買過最抵嘅係麥當娜公仔碟，十蚊加幣（約七、八十港元）就買到，買完之後真係笑住走㗎！第二度買應該要廿幾三十蚊加幣（約百多至二百多港元不等）先有交易。」

另一套讓汀叮驚喜的收藏，是成龍的日文黑膠碟，她興奮地說：「嗰套碟我係喺日本見到，其實本身都唔知裏面係乜嘢，因為我冇機播嗰啲黑膠碟。本來想搵成龍簽名，但後尾諗諗吓都係唔好，因為驚佢高價同我收購，咁我到時都唔知讓唔讓畀佢好，

哈哈！」　

八十年代流行公仔碟

公仔碟在八十年代盛極一時，當年不少當紅歌手如譚詠麟、張國榮及陳百強等，都推出過公仔碟，直至CD推出後，公仔碟才逐漸式微。汀叮指公仔碟其實是特別版黑膠碟，主要發售給唱片發燒友作收藏之用。談到黑膠碟的保存方法，她笑言很簡單：「最重要係個紙套唔可以濕，所以我會將啲黑膠碟放喺一間抽濕設備好好嘅房仔度。」