Lynn等得太久「催婚」

名模熊黛林（Lynn）前晚性感谷胸出席內衣活動，向來避談緋聞男友郭富城的她，一反常態大方談論「婚事」，她直言平時拍拖已很低調，故結婚一定會公開，又指不抗拒做龍年新娘。

熊黛林（Lynn）、何佩瑜（Jeana）、林莉及鍾采羲（Iris）等前晚出席內衣品牌Victoria's Secret澳門新店開幕，穿性感Tube Dress的Lynn表示會上網選購性感內衣，又自爆曾穿Push Up Bra，令上圍連升三Cup。問到如何度過元宵佳節？她說：「同朋友過。（有冇城城份？）成班朋友。」

Jeana進軍日本

問到是否已選購情人節禮物給城城？她指城城甚麼都有，記者即笑指他尚欠一個老婆，Lynn撒嬌說：「呢個幫唔到佢，要佢自己諗。（傳你哋6月結婚？）我都覺得傳聞奇怪。（想唔想做龍年新娘？）唔會抗拒，不過酒席Full晒，今年太多人結婚生仔，好忙。」問到與城城對婚事是否有共識？平日避談戀事的她一反常態地說：「冇認真諗，不過都唔想身邊朋友個個有晒小朋友，自己仲好孤單。」談到同公司的Angelababy被指秘婚，Lynn說：「如果佢有喜訊我會祝福佢。（你會唔會秘婚？）平時拍拖已經好低調，唔可以日光日白行街，如果結婚都要隱瞞就好慘，我都希望所有人祝福我！」

至於谷盡「不倒胸」的何佩瑜（Jeana）透露將到日本發展，公司正跟安室奈美惠的監製今井了介洽談：「佢話會安排一個好似木村拓哉咁靚仔嘅跳舞老師教我。（性感演出？）都要o架！佢都睇過我本寫真，而我去見佢時係淡妝，不過佢話鍾意我濃妝多啲！（介唔介意你整過容？）佢覺得改善自己外貌係好，反而原地踏步就唔好。」此外，同場的模特兒林莉自爆兩年前曾有追求者求婚，但被她婉拒，結果現在變成爛茶渣，她希望今年能找到真命天子。