Kary「霏」聞當笑料：再拍拖未必公開

歌手吳雨霏（Kary）近年先後跟周柏豪及林子祥（阿Lam）兒子林德信傳緋聞，Kary強調與他倆只是普通朋友，現階段感情一片空白。曾試過公開戀情的她坦言見過鬼怕黑，下次拍拖分分鐘玩地下情。

好搞笑，呢幾個月嘅緋聞男友等如我過去9年嘅緋聞男友數量，我都想搵真命天子，不過實在好忙，啱啱轉新公司唔想心散。投入感情要放好多時間，可能受老竇影響，由細到大都唔係放好多心機同時間喺拍拖方面。父母從來冇逼我結婚、生仔，反而叫我睇吓樓，投資吓，我諗佢哋諗法比較似呢一代人，女仔應該要獨立啲有自己嘅事業，唔一定要靠人哋。

為家人添麻煩

曾經將愛情放喺第一位，到頭來成個人仲迷失。可能依家大咗，考慮嘅嘢多咗，以前鍾意就一齊，依家會諗大家夾唔夾。要遇到個啱係會難咗，但我唔急，最緊要唔好影響事業。如果真係搵到，應該唔會公開，之前公開過，佢唔係圈內人，公開咗好似要佢接受。不過冇辦法，做呢行會帶麻煩畀朋友同屋企人，若果再拍拖就要慎重諗吓公唔公開，就算唔公開，只係我想保護段感情多過我唔想認。

隨時話嫁就嫁

我依家都有同洪立熙（前男友）聯絡，其實好難得，分開咗都做得番朋友，知佢依家冇女朋友，但暫時冇諗翻撻，我想做好啲工作，佢又有嘢做。至於周柏豪真係好搞笑，唔明點解同佢傳得咁多，又冇同佢畀人影，大家識咗好耐，當年佢做模特兒，想做歌手但一直冇機會，依家可以開演唱會好感動。父母唔會問緋聞，都唔覺佢哋有睇報道。同林德信傳仲搞笑，大家係朋友，又同一間唱片公司。真感情要隨緣，唔可以逼，我依家成日講唔想拍拖、唔想結婚住，可能隔1年我好想結婚，呢啲嘢好難講。（明日待續）