黃宗澤夜蒲畀女圍「醉」High

胡杏兒近日北上拍劇搵銀，男友黃宗澤難得「無王管」，即於大前晚到中環夜蒲，被多位女士主動埋身，艷福不淺！玩到貓晒的他最終更要由兩名男友人合力抬他上車走人。

出爐視后胡杏兒與黃宗澤（Bosco）拍拖七年，早前杏兒更被拍得在男方寓所內親熱，去年杏兒在台慶頒獎禮上封后時，在台上向Bosco發表「互頂宣言」，可謂打風都打唔甩！

最近杏兒長駐內地拍劇，孤獨留港的Bosco難得「無王管」，大前晚與數名男女友人到中環蘭桂坊夜蒲。戴上賊仔帽的Bosco與友人坐在酒吧一角，低調地邊飲酒邊聊天，有說有笑。未幾，Bosco打算前往洗手間時，被現場幾位女子認出，並大讚他靚仔，還上前要求合照，Bosco身旁的男友人即時擋駕，但仍被兩名女子成功埋身，並傾談了一會，看來Bosco艷福不淺！

打戙入．瞓住走

凌晨三時，玩得興高采烈的Bosco不勝酒力，軟癱地坐在梳化上，即使友人遞上暖水，爛醉如泥的他亦毫無反應。一小時後，友人見他仍未酒醒，即由兩位男友人合力扶他落樓。原本親自駕車的他未能駕駛，遂由友人載他回家。

事後記者致電Bosco，問他當晚被多位女子包圍，可覺甚有艷福？他說：「我喺馬來西亞啲朋友嚟咗，所以先出去玩，我都好耐冇去玩！」提到當晚飲醉，他即尷尬大笑地說：「哈！係！我的確畀人灌醉咗，不過有咁多朋友在場，所以都唔驚。（怕唔怕杏兒嬲？）杏兒都識我啲朋友。」而杏兒至截稿前仍未回覆。

婦唱夫隨食湯圓

另外，昨日是元宵佳節，杏兒在微博向大家送上祝福：「祝大家團團圓圓，元宵節快樂！記得吃湯圓！」而Bosco在女友留言半小時後，亦「婦唱夫隨」地在微博作出呼應：「我祝親愛的黃家軍們元宵節甜甜蜜蜜，開開心心，記得元宵節吃湯圓！」