湛琪清林夏薇擺脫裙帶闖新天

關係加外表加努力，一條娛樂圈的上位金科玉律。關係排第一，注定一世有人給力，像林夏薇有以「玉樹臨風」出名的堂兄林峯護航，湛琪清也有「宇宙最強」的表姐夫甄子丹賜名。可惜被人蓋上靠黐之名，沒辦法，凡夫俗子永不明白，努力才是最重要。

身為「宇宙最強」甄子丹的表姨仔、汪詩詩與汪圓圓表妹的湛琪清（Jessica），萬千寵愛在一身！她坦言家人沒有給予壓力：「每一行都有壓力，壓力係我自己畀自己，成日想做好啲！」自言性急的她明白自己條件優厚，令她更逼切報答家人。表姐與表姐夫親身教授兩招在娛樂圈的生存之道，她說：「由Day 1開始，佢哋就同我講：『你鍾意就過嚟香港喇！』我好感謝屋企人明白呢一行，支持我拍戲！」

善用運氣鋪前路

當初隻身離開美國投靠表姐一家，詩詩和圓圓表明希望Jessica自己敲門尋找機會，她說：「當初表姐同我講唔好向人哋表明身份，我亦好堅持靠自己努力。開頭都係自己周圍去公司試鏡，佢哋最多建議我去邊幾間公司Casting。」不過詩詩和圓圓都會親手幫Jessica化妝準備試鏡，又出動私伙衫，她感激地說：「我知佢哋冇必要咁幫我！Auntie又好錫我，對我好似女咁，令我更加想快啲Pay Back！」

在娛樂圈生存，家人的鼓勵非常重要，Jessica慶幸得到家人明白，更周圍帶她試鏡。她首次試鏡早於1998年，當時爸爸在報章上見到電影《轟天炮4》試鏡廣告，便膽粗粗帶Jessica試鏡，9歲的她坐在走廊長櫈上，不小心碰跌一個男人，他問：「你係咪嚟試鏡o架？」她回答：「媽咪叫我唔好同陌生人講嘢呀！」原來他是該片的公司高層，並推薦她面試，最後她成功參演荷里活電影。她自言有時候都靠運氣才有機會成功：「嗰次係咁啱好彩遇到佢，不過當時我咩都唔識，淨係知兩個星期唔使返學！」

誓不負家人所望

最近她在賀歲片《八星抱喜》中與古天樂做對手戲，千金小姐的角色令人眼前一亮！今次由表姐夫甄子丹引薦，監製主動表示有興趣找她參演，她興奮地說：「七點要Standby，我四點就起咗身！好緊張咁不停背劇本，見到古仔都係裝裝吓。拍完都唔敢同媽咪講，怕戲份畀人Cut咗！」

隻身離家的她，在節日中沒有家人陪伴，特別容易感寂寞，但愛情路上經驗不多的她希望先專注事業，她說：「另一半有冇錢唔重要，最重要有內涵，對屋企人好！」詩詩和圓圓更教路搵男友，她說：「佢哋話要識得保護自己，小心周圍識嘅人。不過我都好少出去玩，成日留喺屋企陪Auntie同Uncle！」乖乖女的她性格單純，難怪家人會擔心她被騙。

後記：煲港劇「粵」學愈精

在美國土生土長的Jessica母語是英文、普通話與上海話，由零開始睇香港電視劇學廣東話。經過差不多兩年時間積極鍛煉，現時可以用廣東話交談的她，決心在港發展，希望可以得到更多演出機會。

要數電視城最當時得令的男星，人人都數得出「玉樹臨風」的林峯。而其堂妹林夏薇近日開始在三色台亮相，是否與林峯有關？的確有關係。若非當日爆出林峯有個俏麗又識做戲的堂妹，無綫絕不會一早把她收歸旗下，薇薇笑說：「唔知阿哥幫過我啲乜，我諗係因為佢先多咗人識我，無綫可能因為咁接觸我！」

因為林峯才有人認識林夏薇，然而沒有林峯的時候，薇薇的日子如常地過，想她當時年紀小，人人只知她是香港話劇團的林夏薇，一樣被欣賞，她說：「我係靠自己考入中央戲劇學院，到實習、到香港話劇團，冇人知道我係林峯個妹。當時冇人戴有色眼鏡睇我，做得好開心！」

被扭曲？一笑置之

蜚短流長就如瘟疫爆發，只要源頭出現，薇薇是林峯堂妹這個客觀事實就被無限放大，靠關係、靠黐的抨擊，一度令她相當沮喪，她說：「我聽過好多唔好聽嘅說話，佢哋話我係嗰個乜乜乜，咪就係林峯個妹囉，一味靠黐！但我決定當耳邊風，反而當做動力！我係一個開心嘅人，充滿正能量！」

成也林峯、敗也林峯，薇薇難逃林峯的陰影，但一句「靠自己」，是林峯贈予她的座右銘，她說：「我全家人個個靠自己，所以人人都為自己而驕傲，阿哥同我講過『阿哥希望你可以靠自己』，我就話放心，我一定靠自己！」一句窩心的說話，勝過萬語千言的阿諛奉承。

冇計啦！親戚上頭

血濃於水，注定林峯一世要照顧薇薇這位精乖妹妹，她說：「我哋呢一代姓林得四個人，阿哥嗰邊有三個，我嗰邊得我一個，所以阿哥真係好錫我！有時聽到有人講佢唔好，真係好『銀』耳！但知佢可以Handle得好好，因為佢係好爭氣！」

爭氣跟夢想有直接關係，薇薇只入行五個多月，距離視后仍有十萬八千里，她當下的夢想只有一個：「做人踏實啲好，依家只想得到肯定，唔會再只話我係林峯個妹，用能力去證明自己！」原來薇薇爭氣的DNA，是跟林峯一脈相承。

後記：Timing造就機緣

春節期間，薇薇跟小記都很忙碌，但薇薇為了完成最後的電話訪問，忙極也會致電小記夾時間。可惜就是時間的錯，總是在錯的時間找了對的人，我們追追逐逐，最後這個訪問要在Cova完成，就是薇薇相約小記High-tea，開心到痹！