阿Sa享受地上情 不再秘婚

與陳偉霆愛得如膠似漆的蔡卓妍（阿Sa），昨日冧爆透露拍拖外遊後感情大躍進，並預告將來結婚必定光明正大，絕不重蹈覆轍玩秘婚！

早前有堪輿學家指阿Sa於龍年大有機會秘婚，昨日她與周麗淇及Amanda S.等出席時裝活動時表示，知道自己龍年沖太歲會有變動，可靠搬動家具化解，亦已即時行動。問到會否再秘婚，她自嘲：「秘過一次仲秘？（再結婚會『明婚』？）我希望係！」

外遊返港更甜蜜

她透露與陳偉霆外遊後感情增進不少，但未有結婚計劃，並揚言現階段非常享受公開戀情後的自由：「我依家好開心，因為公開咗拍拖，就算兩個人行街、睇戲、旅行都唔會有負擔，覺得好自由，所以想享受吓先！（生仔呢？）未咁快，我未係高齡產婦。（接唔接受未婚生仔？）我想一步一步，結婚先！相士話我會生3個，我都想，但擔心唔得，因為我身體唔好。」

周麗淇感激無綫

至於周麗淇被問及電視圈挖角潮，她表示未有人與她聯絡，而她與無綫仍有合約：「無綫畀咗好多機會我，我會以無綫為優先！」談及情人節，她笑言公司對她很好，讓單身的她在工作中度過。

而新婚的Amanda S.今年首度派利是，她說：「我預咗6位數字，封利是都封咗幾個鐘，見到大家收咗開心，我都好開心。」

同場還有郭秀雲兒子錢景峰，他透露6年前已加上繼父龐傑的姓，叫「龐錢景峰」，問到情人節與哪位女友慶祝，他說：「畀我女友聽到會殺咗我，我得一個女友Erica！（Mika暗示你一腳踏兩船？）佢信得過咩？我同佢分咗手，單身咗兩個月先識Erica。」