黃貫中拖狗后瞓街睇醫生

黃貫中曾被指「窮Band友」，但其實身家豐厚，家中五頭西藏獒犬已總值逾千萬元。前日他與女友朱茵帶其中一隻「寶帝」求診，因體形巨大而只能在路邊檢查。

愛狗之人黃貫中（Paul）與朱茵拍拖時雖曾被指「窮Band友」，但其實身家豐厚，前日更拖着幾百萬出巡！何解？其實是他與女友帶同身價逾二百萬元、現年六歲的雌性西藏獒犬「寶帝」前往旺角睇獸醫，期間出盡風頭！

朱茵拿拿聲攞藥

當日下午約四時，Paul與重達160磅的「寶帝」現身該處寵物診所，由於愛犬身形巨大，醫生與護士只能於診所外為牠檢查。Paul不時以手臂箍着「寶帝」的頭，當醫生進行檢查時，牠即乖乖伏下任摸唔嬲，Paul還拿着愛犬的手腳給醫生詳細檢驗，全程引來不少途人圍觀及拍照。當Paul預備帶愛犬上車時，還巧遇Band友Joey Tang，兩人傾了一輪狗經後，Paul才安排愛犬返上以西藏獒犬的英文名字作為車牌的七人車。朱茵為免愛犬久等，急急腳步入診所取藥，手持兩大袋藥物步出的她說：「今次好多藥呀！因為畀兩隻狗食！」

事後，記者聯絡家中有五頭西藏獒犬、總值過千萬元的Paul，問「寶帝」身價不菲一事，他說：「其實藏獒都係『海鮮價』，有狗主試過千二萬成交，但亦有人試過開200萬美元（約1,600萬港元），狗主都唔肯賣！『寶帝』係五屆冠軍狗嚟o架，又攞過『最佳藏犬』，曾經有人出四百萬叫我賣，但佢係我個女，唔係有錢大晒，我當然唔肯賣！」Paul透露「寶帝」只是有少許皮膚濕疹，平時愛犬十分健康，為讓牠們有更大活動空間，早年與女友遷往四千多呎的大埔村屋。Paul指藏獒最討厭金毛紋身漢，家中數頭藏獒亦曾為他嚇退賊人。

五度狗展稱冠

狗名：寶帝（雌性）

犬種：西藏獒犬

年齡：6歲

「父母」：黃貫中、朱茵

性格：好勝心強，寶帝曾見到飛機飛過時即撲前打算「咬」它，同時亦會對陌生人加以防範。

威水史：五度獲得國際狗展冠軍及「最佳藏犬」，曾有人在狗展上向黃貫中開價四百萬元購買寶帝，但他不為所動！

備註：根據獸醫黎昌生醫生建議，由於香港夏季較熱，故需要長期開冷氣給愛犬，亦需要有充足活動空間讓牠走動。