周秀娜凹凸爛腳傷疤嚇人

周秀娜靠咪咪及美腿搵食，可惜去年拍攝電影《紙月亮》時，慘被電單車燙傷，致右腿內側留下一條長長疤痕，令男友陳偉成心痛不已，幸而她已買重保險，故決意做激光磨皮撫平傷痛。

近年積極轉戰影圈的o靚模周秀娜（Chrissie），去年到馬來西亞拍攝電影《紙月亮》時，坐在電單車後座不慎右腳一跣，慘被死氣喉燙傷，即時送院醫治。電影公司為她買下七位數字保險，可獲一般醫療費用，但Chrissie看了一次醫生後便繼續開工，埋下美腿被毀伏線。

當地醫生曾為她外敷內服藥物消炎，建議她多休息，惟《紙》片正在趕工，她依然死頂，四日後更拍落水戲，不知不覺令傷口惡化。雖然一直在痛，但她見傷口似是結痂，依然愛理不理，卻不知道流膿水外滲，硬了的傷口呈現淺黃色，個多月後電影煞科返港才看醫生。

疑似大S

返港後，醫生向Chrissie表示傷口硬硬的一塊並非結痂，而是乾膿，不但令傷口透不到氣，導致未能埋口，更發現霉菌，得知可能成永久性疤痕，Chrissie情緒插入谷底。醫生建議她搽藥膏把乾膿浸軟，然後連續清洗傷口兩個月，並須定時服食抗生素，直到去年十二月，傷口才慢慢結疤。可惜長達三吋闊兼半吋長的疤痕凹凸不平，烙印在大髀上，美腿盡毀，她有意以激光磨皮。

記者致電身在內地拍戲的Chrissie，談及美腿盡毀，她說：「整親嗰陣都唔知咁嚴重，之後先識驚，好驚隻腳好唔番，真係好想做激光磨皮囉！但醫生又唔建議我咁做，叫我搽住藥膏先。」

問到會否因此影響收入？她說：「咁又冇乜，但真係好麻煩，每次影相擺甫士都要就位，唔得就用電腦執靚佢！」此外，Chrissie近日惹來變臉疑雲，從她最近拍攝的內衣硬照發現，面容五官跟大S徐熙媛如倒模一樣，認真弔詭。

男友心痛

而Chrissie男友陳偉成（Avis）昨日表示，女友的傷口已好得七七八八，他說︰「佢當時喺馬來西亞嘅設備唔係好齊全，所以返到嚟個傷口好多菌，我都有摸過佢個傷口，又凹又凸，又大又深，我都好心痛，但唔想佢擔心，所以喺佢面前扮冇嘢。」他又說︰「佢講起個疤痕會好唔開心，成日擔心隻腳唔靚，所以我盡量唔會喺佢面前提個疤痕，每次都陪佢覆診，唔想佢自己一個人去，驚佢會亂諗嘢。」