鄭融焗歎「香」橙怒插無良食肆

鄭融年初二與家人食開年飯，慘遭食店送上插過香拜神的橙，令眾人怒髮衝冠！鄭融即在微博留言開名炮轟，誓將食店惡行傳千里。

歌手鄭融（Stephanie）於大年初二與家人一行六人到尖沙咀歎韓國菜，估不到遭遇不禮貌對待。飯後的Stephanie火速將「谷氣事」上載到微博，更放上一張沾有拜神蠟燭的橙的照片：「大年初二在餐廳收個插過香拜神嘅橙，太過分了。」她坦言所點的年糕泡菜拉麵貨不對辦：「係泡菜公仔麵囉！同佢講冇年糕，佢先煮番碗年糕出嚟。」更以「太沒良心」形容食店，最後加上5個憤怒公仔表情以示不滿。

拒再幫襯

記者昨日致電Stephanie了解，她承認年初二遇「怪事」：「成家一行六人諗住開開心心食飯，點知搞到好唔開心，服務態度唔好，加收20%服務費唔一早講，點晒菜先講，都算喇！最後嗰碟橙，根本就插過香拜過神嘅橙，真係好過分！」她曾想開聲向食店投訴：「當時有父母在場，想等啲前輩處理。」Stephanie表示因父母為免生事，才忍氣吞聲：「我知大家都好唔高興，但父母想安安靜靜食餐飯，我阿爸仲話呢碟橙真係『香』橙。」對於開名狂插食店，Stephanie說：「想抒發一下情緒，真係唔會再去幫襯。」