霆鋒砌低里奧仔緊迫碧咸

型男謝霆鋒踏入龍年即鴻運當頭，在台灣一項「最吸引女性」十大型男排名中打入第二，僅次「萬人迷」碧咸，相當威水。而他主演的《逆戰》票房亦突破一億！

影帝謝霆鋒和亞洲天王周杰倫（周董）擔正的英皇電影《逆戰》票房報捷，於農曆新年假期間，在內地、香港、台灣、東南亞及北美等地上映五天，累積票房已逾億元，而兩人的演技亦獲讚賞，可喜可賀。

除了電影票房理想外，霆鋒和周董更是行運一條龍，他們在台灣一項「最吸引女性」的十大型男排名榜中，分別排第二名及第九名，而霆鋒的排名僅次「萬人迷」碧咸，成為排名榜中的華人首位，足見其魅力非凡，深受歡迎。

據悉，該排行榜是根據男星的出眾外表，以及具備出色才華而選出，今次排名依次序為碧咸、謝霆鋒、里奧勒度狄卡比奧、劉德華、意大利性感球星托迪、金城武、蘇有朋、韓星裴勇俊、周杰倫及日本型男木村拓哉。

周秀娜鍾意金城武

該排名榜選出的十大型男，相信是不少港女心水，周秀娜（Chrissie）頭號至愛是金城武：「我12歲已經鍾意佢，佢邊個角度都咁靚仔，係一個完美嘅男人，遺憾入行以來都未見過佢真人，如果有機會合作拍戲就不得了，就算要我扮植物人都願，淨係呆呆望住佢就夠。」官恩娜亦喜歡金城武：「不嬲好鍾意佢，佢咁多年都Keep得好好，如果見到佢真人，我諗我會尖叫出嚟！」至於何佩瑜（Jeana）則認為霆鋒是型男首選：「我覺得佢由內到外都好型，事業上好拚搏，之前佢處理同栢芝嘅感情問題亦好包容，我好欣賞呢種男人，喺香港要搵個有承擔嘅男人好難，所以我好希望霆鋒快啲有第二春。」