梁朝偉「熊」運當頭

梁朝偉及劉嘉玲婚後經常結伴遊山玩水，日前上載新年上山滑雪的照片後，嘉玲前晚再上載偉仔戴白色熊仔帽的搞鬼新照，逾萬名粉絲瞬間瘋傳，令偉仔一夜間贏得「最萌影帝」之名！

於08年結婚後，偉仔跟嘉玲兩公婆經常毫不吝嗇在人前晒恩愛，嘉玲早前更被揭豪擲逾千萬元在北京買豪宅與偉仔築愛巢。他倆雖然密密工作，經常忙得不可開交，但仍盡量抽空過二人世界。偉仔主演的《一代宗師》仍未煞科，但適逢中國人最重視的農曆新年，疼錫老婆的他選擇跟太太滑雪迎龍年。鍾情玩微博的嘉玲日前才上載一張跟偉仔的滑雪照，前晚再來第二擊，發放偉仔頭戴白色可愛熊仔帽的超萌照！

照片可見，頭戴白色熊仔帽的偉仔身穿白色羽絨，全身「白潺潺」恍如一隻巨型北極熊！年屆49歲的影帝童心未泯，不時在友人身後搶鏡，難怪嘉玲也高呼：「小心！熊出沒！」而偉仔亦不時對着鏡頭放電，含蓄微笑扮無辜，可愛之情表露無遺！

冧到姚晨變「花癡」

偉仔扮可愛北極熊就如百年難得一遇的奇景，難怪照片一出，即引來逾萬粉絲瘋傳！不少粉絲盛讚偉仔搞鬼又趣致，笑言「最萌影帝」之名，偉仔絕對當之無愧。就連號稱「微博女王」的內地女藝人姚晨也來湊熱鬧，笑言偶像偉仔令她頓變「花癡」：「允許我花癡一下……老梁老梁，天下無雙！」