廖碧兒行「桃花運」求偶

龍年將至，回復單身的廖碧兒到年宵市場一沾桃花旺氣，渴望龍年有新戀情！而港姐劉倩婷與堪輿學家男友李丞責則拍拖到旺角辦年貨，更「夫唱婦隨」教大家擺「桃花陣」！

回復單身的廖碧兒今年希望有桃花，日前她趁北上拍劇前逛年宵市場，見到桃花檔即停下腳步，還迷信地在桃花前兜圈，問到是否希望新一年有拖拍？她說：「係女仔都想人錫同愛，不過感情呢啲嘢可遇不可求，就算遇到都要時間了解，講真呢幾年想重心放喺事業先，同埋依家興遲婚。（咁你又兜桃花圈？）桃花運可以講人緣嘅，哈哈！」

至於愛得甜蜜的港姐劉倩婷，自去年與堪輿學家男友李丞責公開戀情後，她漸漸從男友身上學到一些風水知識，二人日前甜蜜到旺角買魚買年花，教大家擺龍年桃花陣！李丞責說：「根據流年追星圖，今年流年嘅東北位有『九紫星』到，代表人緣、桃花、喜慶，喺呢個位大家最好擺九支紫色嘅花！」

屋企擺「魚陣」吸水

在花墟買完靚花後，他們雙雙走到金魚街買魚，李丞責表示擺「魚陣」有助豬籠入水，他亦為自己家中添置九條蘭壽魚，劉倩婷則在旁邊幫眼揀條生猛魚。李丞責說：「今年嘅財位係南，因為有『一白星』到，大家可以擺放流動嘅擺設，亦可養魚，最好養一條或九條魚，若養九條魚，就最好八條雜色加一條全黑嘅魚。」