AnaR.:唔信成為Model

自小沒自信的Ana R.，從來沒想過會成為Model，她慶幸能找到喜歡的工作，但模特兒的生涯短暫，她打算多做兩年便轉型，開辦模特兒學校或日間託兒中心。

我做Model純粹機緣巧合，細細個我就學芭蕾舞，本來想向呢方面發展，可惜我太高，15歲已經178cm高，手長腳長並唔適合跳芭蕾舞。15歲嗰年，媽咪唔想我喺周末同男仔約會，將我送去模特兒學校，等我冇時間同男仔出街，諗都冇諗過自己會做Model。我本身性格好怕醜，加上細個被歧視嘅經歷令我好冇自信，我從來都唔覺得自己會畀人接受，更加唔認為自己有條件做Model。有時細佬朋友見我，會讚我靚、好吸引，但我唔會信，認為唔係真。因為我太怕醜，媽咪先安排我去學芭蕾舞，想我唔好咁。後來我贏咗模特兒比賽，有機會出外發展模特兒事業，我75%嘅收入都交畀媽咪管理。

試過被跟蹤襲擊

做Model咁耐，總遇過難捱嘅日子，好似去某地方同其他Model爭、又試過喺陌生嘅街度畀男仔跟蹤襲擊，佢想推跌我，好彩最後冇事，不過諗起都好驚。但我冇諗過放棄，如果唔係，我點撐起頭家？做模特兒賺錢多。我媽咪為我犧牲所有嘢，做兩份工養大我哋，盡力栽培我，希望我可以行一條自己想行嘅路，慶幸自己做到鍾意做嘅嘢，依家我好享受模特兒工作，但唔可以做一世，我打算做多兩年，之後就開辦模特兒學校，將經驗分享畀新入行同想入行嘅女仔知，又或者開日間託兒中心，因為我超級鍾意小朋友。（明日待續）