超蓮偕四眼男睇戲蜜蜜笑

何家索女超蓮甩拖年多，本報收到消息，撞破她與長髮四眼男睇戲，二人散場時邊行邊傾，眉開眼笑，同場還有弟弟猷啟及姐姐超雲。

現年20歲的賭王三太千金超蓮，青春無敵，理應不乏追求者，但自年多前與前男友Jeremy分手後，感情一直未有着落。日前本報收到消息，指她與新歡約會睇戲。

記者趕到現場，碰巧鬼才導演艾慕杜華新作《我的華麗皮囊》散場，露腿的超雲和陳山聰糖黐豆拖到實行先，單拖的猷啟緊隨步出，超蓮則與四眼長髮男墮後密密傾，更被逗得哈哈笑，表情多多狀甚興奮，兩人雞啄唔斷，由戲院傾到出商場。行到露天候車處時落起毛毛雨，超雲與陳山聰登上座駕雙雙離開，猷啟則與超蓮及四眼男繼續候車，猷啟識做地負責撐傘，三人你一言我一語氣氛融洽。

翌日，超蓮急不及待更新微博，直言看戲後「很想吐」，同時透露四眼男名叫陳嘉超（Leo）。記者致電超雲，她帶笑代超蓮否認新戀情：「梗係唔係，唔好搞呢啲添呀！人哋有女朋友o架！」

超雲將交代同居傳聞

超雲坦言見過超蓮不少朋友，問到Leo家世，是否富二代或在外國留學，她說：「呢啲我唔知！」至於問到是否如傳言中與陳山聰搬新屋，超雲說：「日內會出嚟交代，嗰度係媽咪物業，我細個喺度住過。（係咪同居？）呢啲咁私人嘅嘢，唔答。」而陳山聰接受電話訪問時則表示，目前暫不會接拍新劇，但會陪女友出席活動。