Kelly怕餓隨身袋鳳梨酥

三位星級大肚婆陳慧琳（Kelly）、楊千嬅及郭羨妮大談產後變化，已有巨肚的Kelly帶定鳳梨酥睇首映怕肚餓，千嬅亦表示食量大增，亦因為食而被老公喪鬧！

懷孕六個多月的Kelly前晚腹大便便出席賀歲電影《八星抱喜》首映禮，貪靚的她身穿火紅色露肩裝，腳踏吋半高跟鞋，由古天樂全程攙扶，並笑言已檢查其手袋，Kelly即大方打開鑲滿閃石的名貴手袋，當中竟有一件鳳梨酥，認真搞笑！她說：「係呀！我怕睇睇吓戲會肚餓嘛！（佗B點？）個肚大得好快，BB喺我食飽同臨瞓前成日踢我。」此外，她昨日到電台受訪時表示，照4D超聲波後看到腹中「小龍包」的樣子，並大讚其「蝦餃下巴」得意，更揚言生完「小龍包」後就封肚：「聽人講仔好難湊，一個仔等如生四十個女呀！」

而懷孕四個多月的楊千嬅，昨日接受電台訪問時透露口味大變，以前愛食魚的她竟嫌腥，兼且食量大增：「有晚突然想食豆腐花，但夜麻麻甜品舖冇開，丁子高就買咖喱麵頂檔，但食咗又唔係咁舒服，畀佢鬧到飛起！」

郭羨妮示範換片開奶

至於同樣懷有四個多月身孕的郭羨妮，昨日腳踏三吋高跟鞋出席活動，並示範為嬰兒換片及開奶，問到想生仔還是女？她表示沒所謂，但不鼓勵子女入娛樂圈：「老公（朱少杰）想要女，但又驚畀男仔追，話要等個女大學畢業先可以拍拖！」又透露或會剖腹分娩，並要丈夫陪入產房。