Ana R.:我畀人歧視！

混血兒Ana R.，小時候經常遭人白眼，只因混血兒在「那些年」不輕易被接納，連親戚亦對她抗拒。生活在歧視的日子中當然不好過，但這些經歷令她與媽媽、弟弟關係更親密，令她性格更堅強。

口述：Ana R.　筆錄：名人組

對我嚟講，家庭永遠排第一位，依家事業排第二、愛情排第三，以前我會將家庭同愛情放喺第一位，愛情曾經同家庭一樣咁重要！我媽咪為我犧牲好多，令我深深體會到乜嘢係無條件嘅愛，佢係韓國人，Daddy係美籍西班牙人，喺當時嘅社會「Mixed」嘅小朋友好麻煩、更加不被接納，啲人覺得你冇一個純正血統，會歧視你，媽咪同我都畀人歧視。媽咪佗我時，佢啲屋企人都叫佢落咗我，媽咪當然唔肯，佢離開屋企同我Daddy生活，嗰段日子好艱難，全家得我婆婆支持佢。

兼父職照顧個家

我細個時，個樣係好典型嘅中國BB，我Daddy嗰邊啲屋企人都唔接納我，所以我唔可以好似正常小朋友咁生活，成日轉校。我好怕醜，好難識到朋友，最Close嘅朋友就係細佬，佢細我兩年，我哋咩都傾，感情好好。Daddy喺我十歲嗰年離開咗屋企，冇再出現，仲記得我當時跑出去追住佢架車好耐、追到好遠，感覺佢唔會再返嚟，係細佬拉住唔畀我再追。Daddy同媽咪分開我覺得好可惜，媽咪已經好努力去維繫，但要維繫一段關係根本唔容易，尤其當熱情冷卻之後。

每次我問起我Daddy嘅嘢，媽咪都會好唔開心。當我長大後，我覺得自己應該代替我Daddy去照顧媽咪同細佬、照顧呢個家。我可以為咗我屋企人犧牲我所有，佢哋對我嚟講係最重要嘅。

（明日待續）