Crystal賺到笑搬竇

雖然Regen暫離隊，但仍無礙組合HotCha發展，成員Crystal更因少了人「攤分」而收入激增，還密謀搬屋。日前Crystal四出睇樓物色心頭好，甚有精明投資者風範。

近日不時孖住演舞台劇及出席活動的Crystal及Winkie發展不俗，據知Regen暫離隊後，二人收入比前更理想，豬籠入水的Crystal近日在助手陪同下四出睇樓。

年紀輕輕的Crystal睇樓經驗老到，她先到黃埔某地產舖向助手了解行情，然後才找經紀。Crystal很快鎖定了黃埔花園兩個約三至四百呎的單位，她一抵達目標單位，即認真地張望附近環境及視察屋內間隔，又重複開窗關窗，確保門窗沒生銹。

事隔數天，Crystal便搬屋，雖然一個人住，但床褥是雙人床Size。全程由搬運公司代勞的她，始終孭着結他不放，可見結他對她相當重要。而識做的她更買水慰勞搬運工人。

樓價高只租不買

事後Crystal接受本報記者電話訪問時稱，新居只是租盤，她並非榮升業主：「依家樓價都仲係太貴。（賺多咗細屋搬大屋？）唔係，咁啱之前間屋租約滿，咪搵間住得舒服啲。（點解揀黃埔？）貪交通方便。」Crystal更坦言已扑錘：「月租萬零蚊，我覺得幾抵。」可見她賺得盆滿缽滿。