難頂大話情人 忍痛撇周立璟
我同Brian（周立璟）嘅一段情係最刻骨銘心嘅，其實每次同一個男仔一齊都會諗住同佢有將來，因為我每次都好認真，唔係諗住玩玩吓，同Brian都唔例外，當時嗰個年紀更加會諗結婚，分手當然唔會係因為一件半件事，冰封三尺非一日之寒！導火線係有年除夕，佢畀人影到同第二個女仔一齊，今次我真係忍唔到！已經唔係第一次，佢次次都會解釋，叫我信佢，我都選擇信佢，但到最後發現原來佢呃緊我。分開嘅時候大家都好唔捨得，唔係一下子就放得低，佢有挽留我，送名車嚟氹我，但我冇接受，已經返唔到轉頭。我哋拍咗拖四年，可惜最後Work Out唔到，好無奈，但冇辦法！
Ana認真地拍拖，希望結婚生仔！