Ana R.遭男友虐打：斷肋骨甩門牙！

名模Ana R.因為父母分開而有她口中所說的「Daddy Issue」，她不容易談戀愛，不會讓陌生人闖進生命，很難才會開始一段關係。可是，縱然小心翼翼，她在情路上依然受盡傷害，只因她每次都全情投入，愛得愈深，自然也傷得愈深！Ana將一連五日與大家分享心底話。

我爹哋喺我十歲左右就離開咗屋企再冇返過嚟，係媽咪一個捱大我哋，爹哋嘅離開令到我有「Daddy Issue」（父親的困擾），喺感情上有心理障礙，會好難先去開始一段關係。我唔會畀陌生人走入我嘅生命，會好保護自己，就算係約會都要同對方認識咗一段時間，成為咗朋友先可以。如果要發展成男女朋友就更加要有深入嘅認識同了解。我愛一個人會100%全情投入，毫無保留咁付出，所以萬一段關係有咩唔對路，我會好傷！

被人呃最Hurt

之前遇過嘅男朋友當中有啲真係好壞！I am bad luck with the guys！唔知點解最初同佢哋一齊時唔係咁樣，最後竟然好似變成另一個人咁，真係好心痛！我試過畀之前嘅男朋友打、偷我錢同埋精神虐待我，仲要唔止一個係咁，我都估唔到呢啲事會發生喺自己身上。試過同之前嘅男朋友嗌大交，面臨分手邊緣，我提出分手但係佢唔肯，佢當時好暴躁又好激動，情緒好似失控咁，發晒脾氣仲郁手推我同打我，最嚴重嗰次係令到我斷肋骨，甩咗兩隻門牙。我覺得喺一段關係入面，最傷害我嘅就係佢呃緊我，但其實全世界都知，淨係得我一個唔知！即使佢做錯咗，我依然會畀機會佢，我係一個好容易心軟嘅人，可以原諒佢好多次，畀好多次機會佢，但係如果佢過咗我嘅底線，就冇得返轉頭，因為我嘅底線已經Set得好低，好難超越到，要去到呢一步我真係徹底心死，以後都唔會再原諒佢！

今年閃婚生仔

雖然有過呢啲慘痛經歷，但我唔會驚咗以後唔拍拖，我依然相信有日會搵到我嘅真命天子，依然相信愛情，只係依家我嘅戀愛方式會比之前更加小心，更加謹慎。我相信每個人都會有屬於佢嘅另一半，我唔知呢啲係咪就係婚姻，我希望自己一生人只結一次婚，期待呢一日嘅來臨，不過我唔會急急結婚，身邊雖然Keep住都有追求者，好有條件嘅都有，富豪級都有，但始終唔啱眼緣，P:唔係嗰種感覺。

好想可以快啲遇到我嘅真命天子，最好係亞洲人，我想同亞洲男仔結婚，婚後就即刻生BB。我好鍾意小朋友，好心急想快啲生BB，愈快愈好，希望可以喺今年之內成事！我考慮緊要有小朋友，所以先至會諗結婚，但我亦唔排除會生咗BB先結婚。我家庭觀念好重，鍾意大家庭，想生五個小朋友，咁先夠熱鬧！（明日待續）

Profile

姓名：Ana Rivera

國籍：美籍西班牙及韓國混血兒

身高：178cm

三圍：33、25、36

嗜好：跳舞、烹飪

演出經驗：

Fashion Show/Event：

Christian Dior、Loewe、Marina Rinaldi、Ports 1961、Miu Miu、Just Cavalli、Max Mara、Max & Co、Rado及Mikimoto等。

Music Video：

郭富城《渴望無限Ask For More》、《只有愛》、任賢齊《流著淚的你的臉》、馬浚偉《史理夫》