楊汀叮密謀發寵物財

Angelababy師妹楊汀叮乃愛狗一族，本身已養了三隻狗的她，日前再添新成員─朱古力色茶杯貴婦犬Muffin，諗頭多多的她更密謀發寵物財，包括推出寵物補品及開設狗酒店，誓要開拓寵物市場！

愛狗之人楊汀叮家中原本已養了黑金美式波形松鼠犬Pudding、迷你英式松鼠犬Pancake及西施狗Donut，但早前她經過寵物店時，再對一隻朱古力色茶杯貴婦狗一見鍾情，最後按捺不住把牠買回家，還命名為Muffin。養了一屋狗仔，汀叮為牠們着實犧牲不少，除要照顧牠們的起居飲食外，每逢放假她都甘願留在家做宅女陪狗仔嬉戲：「依家我放假都寧願留喺屋企同班狗仔玩，玩之餘仲要教佢哋基本指令。」

開狗酒店撻Q

幸好新成員Muffin跟其餘三隻狗仔相處融洽，不過牠只得五個月大，比起其他狗仔仍相當貪玩，一落地就精力充沛，不停逗其他狗仔玩，變成家中的小惡霸！汀叮除平時出活動接騷外，她亦相當有生意頭腦，她指香港有很多愛狗之人，寵物市場仍大有發展空間，早前她本打算跟朋友各自斥資六至七位數字開狗酒店，但因租約問題而擱置：「有諗過賣寵物補品，同埋自己設計狗仔衫、飾物，我本身養咗幾種唔同嘅狗，都好清楚唔同類型嘅狗會適合啲乜。」