許廷鏗最想分甘同味

樂壇新人王許廷鏗（Alfred）、林欣彤（Mag）及鄭欣宜連月來在頒獎禮中，因角逐新人獎而鬥得難分難解，Alfred雖跟她倆未至於Friend到傳緋聞，但關係良好，故不擔心因爭獎而傷害彼此感情，最理想是個個有獎。

許廷鏗先後在四個頒獎禮上奪得新人獎，談及和他爭獎的主要對手，不離同是《超級巨聲》的師妹Mag和同唱片公司的師姐欣宜：「我哋三個好好朋友，同Mag私下都會約埋《巨聲幫》啲朋友出去玩、食飯，而欣宜就因為同唱片公司，佢好照顧我。」Alfred坦言恨攞獎，還指跟Mag及欣宜的友情沒有因角逐獎項而受損，問到最理想的局面？他說：「咪依家咁，個個都有獎囉！咁大家就最開心。」

趁年輕瘋狂

還有一年便牙醫畢業的Alfred，曾對前途感到迷茫：「到底我要做專業牙醫定要投身娛樂圈呢？我好似企喺人生交叉點咁，唔知點好，最後有牙醫前輩同我講：『人要喺年輕時做啲瘋狂嘅事。』」所以Alfred最終選擇做歌手。

Alfred坦言每天要工作、返學及溫習，只得5小時睡眠，幸好年輕，身體可應付，但皮膚已響起警號：「因為唔夠瞓，所以生咗好多粒粒，但嚟緊課程唔會太辛苦，唔使再捱夜，我諗皮膚問題會有改善。」