姜皓文喪跑 大髀肌肉撕裂
姜皓文（黑仔）在英皇電影《逆戰》中演一名國際刑警，在吉隆坡取景廿多日，他坦言日日拍追逐戲，跑到大髀肌肉撕裂：「我同廖啟智、霆鋒都好多對手，其中一場同智叔糾纏，佢支槍插入我口，點知錯手撞崩隻牙，我到依家都未得閒補番佢，另一場追霆鋒戲要爆玻璃窗，唔知隻手割傷咗，真血以為假血，最後要返酒店先知，真係好甘！不過，拍攝過程過足戲癮，又好正，只係因為封街三日拍戲，我畀吉隆坡嗰邊朋友投訴！」
今次黑仔形象有突破，他以長髮留鬚造型上陣，原來都是導演林超賢的意思，希望他能擺脫黑仔原有形象！黑仔除大讚導演拍槍戰場面了得外，還佩服對手霆鋒賣力演出，他說：「佢跳樓戲親身上陣，就連同我對打戲，為咗就我唔好受傷，點知搞到佢自己隻手抽筋！」
姜皓文在《逆戰》中飾演國際刑警，搞到周身傷！
姜皓文（左）大讚拍檔霆鋒演出落力。