古仔操肌過龍勞損

古天樂在賀歲片中化身地盤佬，冒着拉傷的危險日夜操肌，結果一身結實肌肉令拍檔陳慧琳（Kelly）也嗒糖！Kelly笑言老公都羨慕古仔的巨肌，但無奈滿身都是「一Pat Pat」贅肉。

連續四年演賀歲片的古天樂，在新片《八星抱喜》中再放笑彈，飾演地盤工人的他與Kelly演一對。身懷六甲的Kelly大住肚開工，早知秘密的古仔大讚她專業：「佢好似冇嘢咁！我就盡量小心囉！本來要抱起佢都改咗就咁攬。」Kelly則笑言拍攝過程完全不辛苦，因獲劇組優待可早收工：「拍開心戲好，當胎教呀！（老公Alex反對？）有問過吓，佢都知我有分寸。」

黃百鳴「冇」情

古仔在片中狂晒肌之餘更有「全裸」戲份，不用埋位時即狂舉啞鈴鍛煉麒麟臂，卻因練過龍導致「癱瘓」：「搞到肌肉勞損發炎，上半身試過唔郁得要睇醫生。」雖然最近肌肉稍為縮水，但古仔亦滿意身形：「要改善就係腹肌可以再勁啲，不過太大隻好多動作都做唔到，沖涼都唔到背部啦！（被女同事抽水？）我見佢哋同我嘅性感相玩自拍，啲姿勢都幾大膽！好搞笑！」Kelly亦讚古仔肌肉滿分夠結實，問到是否喜歡肌男？她說：「幾好o架！健康同着衫好睇呀嘛！（老公身形點？）剛拍拖時都有肌肉，依家一Pat Pat！」她踢爆老公對古仔的身形甚為欣賞，但只有三分鐘熱度沒有操肌，但她笑言不會強迫老公。

監製黃百鳴表示今次以星光熠熠做賣點，他則沒有感情線，只跟內地新星楊冪演父女，並指甄子丹會開金口唱許冠傑名曲，定必令人驚喜：「佢歌喉好掂，而且吳君如嘅癲令子丹更生動！（今年贏曾志偉？）有信心！」