郭羨妮：佢冇咁完美就好

要數郭羨妮（Sonija）圈中好友，5隻手指數得晒，與佘詩曼最Talk得，異性密友則非馬浚偉莫屬，兩人更因傳撻着而種下心結，幸最後能解開，Sonija強調不覺馬浚偉有意追求，又指對方太過執着。

口述：郭羨妮　筆錄︰專案組

其實我同圈中朋友冇成日Keep住聯絡，但心中好朋友有好幾個，好似佘詩曼、陳敏之同唐寧，阿佘合作拍過幾套劇，佩服佢好捱得之外，樣樣嘢都控制得好好，佢處理負面新聞都好叻，唔會理人講乜，當然佢工作上亦做得好好，我要向佢學習，唔知點解佢唔瞓幾日都冇事，可能佢有自己方法紓緩壓力。而且佢係一個好信得過嘅朋友，大家唔多時間傾心事，但試過一齊飛去第二度做嘢，我哋可以成程機傾唔停。

冇蝦楊思琦

之前同阿佘拍劇畀人話蝦楊思琦，其實只係我同阿佘識得比較耐傾到偈，變咗冇理思琦咁，咪覺得我哋蝦佢，但有乜好蝦，只係啲人寫，根本冇咁嘅事，我同思琦都有傾偈，之後合作都冇嘢。我搬去清水灣住都係因為敏之，之前我搵樓佢叫我去佢嗰度附近睇吓，佢對朋友好好，佢公司Locker仲貼住我張相，真係好愛我，但依家少聯絡，佢又忙，不過大家在心中。唐寧大肚時有探佢，我同佢係喺好早期去非洲拍劇識，嗰時仲有敏之同鍾麗淇，4個女仔瞓一張床望住天花傾偈，我諗一世人都冇乜咁嘅機會。

圈中男仔好友真係冇乜，馬浚偉都算係，但深入程度唔會同女仔一樣，記得嗰時大家走得埋，但唔覺得佢追我，到有人傳我哋一齊，嗰時我好敏感，大家之後好似嬲咗咁，加上各有各忙，冇理到件事，之後一齊拍劇雖然好少同場，但都冇講嘢，因為有心結未解。到好多年後再一齊拍劇，有一次大家一齊飲嘢，佢經理人都喺度，有提到件事點解會咁，之後大家個結解開咗。依家我幾信任佢，知佢咩人咩脾氣，同佢合作好開心，不過佢要求好高太執着，如果冇咁完美主義就好。　（全文完）

後記：無言的幸福

Sonija近期喜事重重，去年結婚及成功懷孕，難怪面上總流露着幸福的喜悅，訪問當日，無論是拍專訪照還是做訪問，她亦難掩喜悅，無時無刻都看到其笑容，令整個訪問氣氛變得輕鬆，看到這個幸福女人，真讓人羨慕。