林峯接受不同聲音

無綫行政主席梁乃鵬博士昨日率領高層樂易玲、林峯及二十八位候選華姐,為將軍澳電視城新落成的Sky Zone揭幕。林峯憑《Chok》奪勁歌金曲金獎惹爭議,陳奕迅亦拿林峯來開玩笑,林峯說:「同佢哋私底下好Frined,根本冇嘢,唔好將件事放大、大驚小怪,心情冇受影響,每次頒獎禮後都有唔同聲音。」候選佳麗昨日以運動裝亮相,唯獨U許敏將外套拉鏈拉低大騷咪咪,成功搶鏡。

梁乃鵬透露無綫已在將軍澳工業邨購買15,000平方米地皮,準備興建新媒體大樓及能容納數千人的大型綜藝表演館,投資高達十億元。對於樂易玲再傳離職,梁乃鵬否認,而樂易玲對於其愛將林峯得獎惹爭議,她說:「可能佢同TVB係經理人合約嘅關係,根據分數佢係名列前茅,如果怕畀人講唔畀獎對佢都唔公平,我哋要捍衞勁歌嘅制度。」

而徐子珊昨日出席活動時,對於「阿哥」林峯奪勁歌金曲金獎後遭人圍插,子珊說:「阿哥首《Chok》幾好聽,我實撐佢,其他歌我未聽過,所以要我評邊首歌至係金曲就唔夠公平。」

林峯率華姐為電視城新落成的Sky Zone揭幕及拜神。