郭羨妮超齡邊緣：唔試一定後悔

郭羨妮於99年趕搭尾班車參加香港小姐，她坦言不參選必定後悔，回想從前，因同屆勁敵如雲，睇好胡杏兒和原子鏸的她，最終奪冠也感到意外，及後她再出戰環球小姐，但當時真的鬥靚鬥到攰，心態已疲憊不堪！

點解我會去選美？我記得做空姐嗰時，有好多同事一有選美就鼓勵我去參加，其實98年我已經有衝動去選，但嗰時我仲未到參選年齡的限制，而且要穿泳衣我好Concern（關注），又會諗要畀志偉玩，所以做多一年空姐先。到99年我25歲，最後一年可以參加我就去試吓，當時會諗人哋未必收我，又會諗係咪有背景先得，而且唔覺得自己好得，但唔試我一定會後悔！

初時我以為屋企人會反對，但爸爸媽媽都好支持，之後我順利入圍，第一次返香港見記者，見到同屆女仔好靚，好多係Model，而我就好土，唔識裝扮，我記得我自己買OL衫去，仲特登去髮型屋Set頭，係好平民。

由出外景到準決賽，我覺得大家都冇嘢，好開心冇話明爭暗鬥，但到準決賽Foul走一部分人，我先Feel到有比賽嘅感覺。而當時我冇諗過自己會得，都係平常心，因為同屆好多都好靚，好似有原子鏸、胡杏兒，可能係我行運。

「唔想再同人鬥靚」

選到最後其實我好驚，記得嗰時起初有5個佳麗等宣布冠軍，到最後得番3個人等宣布冠軍，然後聽到司儀叫我個名，個心諗今次死喇！因為得咗，人生會有好大改變。當選之後嗰一年好忙，好多嘢做，要選環球小姐同華姐，當時個心好累，真係唔想再同人鬥靚！

我從來冇諗過入呢行，因為自己冇表演欲，係一個好靜嘅人，冇諗過會唱歌同做戲，所以當選後，有好多年掙扎緊係咪適合做呢行？因為我覺得自己性格唔太適合，所以入行3年仲諗緊，而且覺得辛苦，有諗過放棄呢行返加拿大搵份工，做番一個普通人。（明日待續）