郭羨妮拒戀飛機師：我好憎

做空姐是不少港女夢寐以求的職業，大部分更想嫁飛機師，但郭羨妮非常厭惡做空姐，因飛一次瘦3磅，她更抗拒戀飛機師！

口述︰郭羨妮　筆錄︰專案組

未參選前做空姐，但自己當時想返嚟考警察，因為我細個就想做警察。記得97年8月大學畢業，當時國泰喺溫哥華請人，爸爸就叫我去試吓。其實係佢細個想做空中少爺做唔到，先叫我去做，我覺得OK，因為可以返香港，之後可以返嚟考警察。做空姐後順利返到香港，嗰時我仲走去考警察、消防，可能整定，做消防我唔夠高，警察面試嗰陣我就飛咗，當時我諗做空姐唔係終身職業，只係過渡玩吓。

冇精力去Clubbing

做空姐人工幾好，又有Pocket Money，千幾蚊一程，而且我同屋企人住，冇乜點使錢，份糧都拎嚟儲，而且有好多人鍾意買名牌，但我冇。因為我大學畢業加上個樣比較乖，開始已經喺頭等同商務客位度做，所以我冇遇到啲咩特別事，但我好怕服務客人，成日匿理個廚房度。但都試過有啲客人好唔合作，覺得坐頭等好巴閉，我收碟時因為唔夠手長，都唔幫手。

做咗空姐年幾覺得幾好玩，學咗好多嘢，但我冇畀飛機師追，因為我好憎飛機師，佢哋好多要求，我哋好忙，仲成日打嚟話要乜，所以我冇畀機會機師，佢哋行埋嚟我就走，當然有啲人鍾意入去同佢哋傾偈，但我唔鍾意！我對做空姐好厭惡，成日飛紐約同香港好悶，而且辛苦，飛一次瘦3磅，因為食唔到嘢，返到嚟又有時差，所以再長做落去就覺得有少少浪費！我唔明白點解其他人咁好精力，一返到香港即刻出去玩，企咁耐腳都攰啦！我當時只得廿二、三歲，但我好鍾意Sleep，又唔鍾意嘈，唔煙唔酒，所以唔鍾意陪佢哋去Clubbing。