老闆軒仔：一腳踢做阿四！

所謂「人怕出名豬怕肥」，張敬軒於07年憑一首《酷愛》熱爆全城，但隨之而來的新聞卻令他吃不消，情緒受困，最後他竟放棄賺大錢，樂做「低調歌手」！

當年《酷愛》為我帶來好多好多；不論喺工作機會、獎項、到知名度，令我推上一次事業嘅高峰！然而喺相對論來講，你有得，必定有失，緊隨掌聲而來，就開始有報道話我有「大頭症」，寫我人紅變囂張，仲改我名叫「張勁囂」，呢類新聞不斷出現！

情緒受困

試過我發段微博話自己精神有壓力，對我嚟講有抑鬱、情緒問題屬小事到不得了，但竟然某電視台節目搵心理醫生去分析，搞到我真係吃不消！我當然想紅，都想自己受歡迎，令更多人欣賞自己嘅音樂，但如果紅就要承受呢個「Package」（套餐），已經偏離咗自己嘅想法，我Plan嘅職業生涯唔係咁樣。

當時我開始處理點樣取捨，適逢同舊經理人公司約滿，有幾間公司因為《酷愛》對我有好高期望，願意出好好條件簽我，話可以幫我事業再上更高。紅定係低調，低調收入就少啲，知名度又低番啲，但壓力會冇咁多，最後，我選擇咗後者，決定自己開經理人公司。

前輩相助

低調後新聞減少，不過經營一間公司要燈油火蠟，自己要作適當調節保持人氣，要勤力幫公司搵收入，喺澳門接演唱會嚟做，好感激一班前輩劉家昌、甄妮、蔡琴、草蜢、陳綺貞畀機會我呢間只得六個人嘅小公司搞演唱會，當我代表公司出去做嘢，我會放低藝人身份，大小事務一腳踢唔計較做「阿四」！（明日待續）

口述：張敬軒