親證朱麗倩懷孕四個月 華仔十問九唔答

劉德華自09年證實與朱麗倩已婚後，一直盛傳努力造人，直至早前在官網暗露玄機指「吾家有喜」，令「龍年爸爸」之說甚囂塵上！一直未有明言「喜訊」的他，昨日終肯親證太太懷孕！

劉德華與朱麗倩結婚3年多，一直盛傳努力造人，直至去年11月，華仔在官網暗露玄機指「吾家有喜」，暗示趕得上龍年做爸爸！雖然華仔早有暗示，但由於一直未明言太太懷孕，令外界還是「估估吓」！昨日華仔宣傳新片《桃姐》時，終於親口證實太太懷孕，笑到四萬咁口的他，雙手合十向各界表達謝意，興奮度不輸給同樣懷龍胎的陳慧琳與楊千嬅。

拍完戲「放產假」

親證將榮升爸爸的華仔，未知是否怕私事搶去新戲焦點，一開始已強調：「唔想講咁多家事，想將工作同屋企嘢分開。」他更以招牌金句安撫傳媒：「乖啦！唔好問！」記者隨即借用另一位天王黎明的金句：「請容許我哋曳一次！」其後，華仔說：「喺網上宣布時3個月，依家差唔多4個幾月。」不過他不願多談太太有否害喜：「完喇！完喇！多謝！」對於龍胎是仔或女、有否上育嬰堂及是否已改名等問題，他一律耍太極：「多謝多謝！我哋私下談論。」面對記者鍥而不捨追問有否Book床位及買BB用品，華仔「投降」說：「點解你哋咁固執？」雖然他未肯透露是仔或女，但卻笑言仔女都冇所謂：「遲啲私下話畀大家知！」他又指未與同樣懷龍胎的千嬅交流「養胎」心得。

至於會否停工陪老婆「放產假」，華仔表示要先完成手頭上兩部電影的拍攝工作，記者笑問會否叫華媽媽幫手湊B，心情大佳的華仔抵死地說：「唔知喎！我幫你問吓吖！」而與華仔情同母子的葉德嫻，有默契地與華仔同樣口密：「家裏的事不能講，開心事都唔講得。」