城城墮6呎高台 撻到四腳朝天

郭富城前晚尾場演唱會發生意外，不慎從6呎升降台跌下，撻到四腳朝天，嚇到捧場的緋聞女友熊黛林（Lynn）傻了，猶幸城城大步檻過，有驚無險，還如常表演跳彈床及空翻，令全場拍爛手掌。

前晚，《郭富城舞臨盛宴世界巡迴演唱會2011香港站》舉行第17場最後演出，城城全情投入表演，整晚掌聲不斷。豈料尾聲演出變形金鋼舞台一Part時，城城換上長褸唱《鐵幕誘惑》，升降台突然失控急墮6呎，他即時失平衡倒地，跌個四腳朝天，表情痛苦！城城臨危不亂，快速爬起身準備再表演，但工作人員已急急扶他入後台檢查傷勢。

打空翻兩度失手

幸好城城沒有受傷，很快已再出場表演彈床舞，但因中間的舞台已損毀不能再用，令城城做空翻時兩度失手，臨完場時城城再打空翻才結束個唱，歌迷狂喊安歌十分鐘，但城城都不再出場。

其後，城城在慶功宴上若無其事地說：「我冇受傷，一啲都唔驚，可能自己膽夠大。」他估計是舞台勞損，令子母台的威吔斷裂才發生意外，而他不忿氣彈床失手，故臨完場再打空翻。

Lynn嚇傻急慰問

此外，對於緋聞女友熊黛林（Lynn）前晚帶同家人捧場，早前又大讚他的個唱有100分，城城說：「多謝。」至於跟Lynn在除夕倒數騷上世紀一拖？城城表示見到熟朋友握手很正常。而Lynn接受電話訪問時坦言，目睹城城意外嚇傻了：「我個位啱啱睇到，嚇到傻咗！佢本來應該繼續跳，當時啲燈黑晒，舞蹈員落晒台，氣氛好凝重，後尾見佢出番嚟先鬆口氣，作為朋友有慰問佢。」