張敬軒以港為家：想攞特區護照

02年張敬軒憑一首《My Way》由廣州來到香港發展，當年曾經定下兩大目標，其中在紅館開演唱會已經如願，剩下的一個願望，原來就是得到一本香港特區護照。

我決定嚟香港唱歌時21歲，今年已經係第十個年頭。十年嚟我由廣州人變咗半個香港人，有香港居民身份證。我嚟香港發展早已定下兩個目標，一個係「紅館演唱會」，另一個係「香港特區護照」，第一個已經達成。唔係因為我想做香港人，而係我好鍾意周遊列國，但攞內地護照好多地方都要簽證，又要提供資產證明，莫非冇錢就冇資格去旅行？連你銀行有幾多錢，幾多收入都要知，完全冇私隱。

我喺香港生活多年都冇試過畀人歧視，叫我「大陸仔」或者「阿燦」，好多時係我畀壓力自己，過馬路冇車，側邊所有人都過晒，我都要等綠公仔先行，因為「張敬軒」係內地落嚟，喺香港大多數唔睇燈過馬路都係內地人。有次喺中環等的士，有個空水樽喺腳邊，我二話不說執起佢丟落垃圾桶，唔想畀人誤會個樽係我。因為太多內地人喺香港唔守規矩，好似喺商場、主題公園隨地大小便咁。

做榜樣引導同胞

我見到都唔會鬧，只會做好自己去引導佢哋。之前久唔久喺微博就畀人鬧「反骨仔」，可能我只留言一句「終於返到香港」，就畀啲衞道之士鬧：「廣州先係你屋企，你咪扮香港人！」所以，有啲位當冇青紅皂白可言，少說話多做事。　（明日待續）