JJ爛瞓累大肚郭羨妮食風

郭羨妮懷有三個多月身孕，宣布停工養胎，但昨日仍盡己任為劇集宣傳造勢，可是同劇演員賈曉晨遲到半小時，令大肚婆與其他演員齊齊食西北風呆等！

郭羨妮昨日穿上三吋斗零踭長靴、襯短裙和皮褸，宣傳劇集《缺宅男女》，由於活動在商場高層露天花園舉行，風勢強勁，令演員包括郭羨妮、謝天華、吳卓羲及羅仲謙等人硬食寒風，鍾嘉欣的短裙更被風吹起險走光！

由於賈曉晨（JJ）遲了半小時才到場，要眾人食風呆等，難怪天華按捺不住在台上揶揄JJ：「有錢女（角色）都唔可以遲到！」JJ尷尬地說：「對唔住呀！真係唔好意思！鬧鐘響咗我又瞓番！」她解釋之前習慣夜瞓，加上宣傳緊張導致早上七時才能入睡：「我已經校咗兩個鬧鐘。（買多三個啦！）睇嚟都要，惟有請食飯補數！」

脾氣大打老公

預產期為明年中的郭羨妮，承認因貪靚而穿高跟鞋亮相，她說：「行得穩陣冇問題喎！做個靚媽咪。」問到BB性別和是否自然分娩？她表示未清楚：「會喺香港生，我都怕冇產房，所以一早Book咗，仔女都冇所謂啦！老公就想要女。（生幾個？）一個先，生完會喺香港住，依家已經停工，喺香港有媽咪照顧。（有脾氣？）都有o架！老公要捱打！哈！」

吳卓羲講價

另外，吳卓羲表示婚後要與母親同住，若女友不肯，寧願分手。問到現任女友是否不願意？他說：「你哋講咋嘛！」問到是否以十五萬元酬勞出席除夕倒數活動，他指「大概」差不多。而謝天華則未有承認除夕價十五萬，更笑言酬勞過百萬才是。至於羅仲謙指暫時未有需要置業，問到沒有私人空間會否不便拍拖？他說：「依家唔會嘅。（帶咗Tavia返屋企未？）邊個Tavia？（楊怡呀！）冇咁嘅事，都唔係拍拖。」