邵美琪暗認婚訊：開記者會講

有傳秘嫁少夫的邵美琪，昨日與黎耀祥及米雪等為新劇開鏡拜神，春風滿面的她表示新年會「派利是」，更揚言召開記者會公布婚訊。

好戲之人黎耀祥、邵美琪（Maggie）、米雪及陳茵媺等昨日以清裝造型出席新劇《大太監》開鏡拜神，米雪本因檔期問題辭演「西太后」慈禧，並由張可頤頂上拍攝節目巡禮，但角色幾經轉折後仍落在米雪手上，更獲飾演李蓮英的祥仔屈膝攙扶，盡顯太后氣勢！雖然如此，但其風頭仍不及傳秘嫁武打演員施祖男的Maggie！

米雪推Job演慈禧

飾演「東太后」慈安的Maggie未有正面回應婚訊，但全程春風滿面，問到今年會否派利是？她說：「藝人不嬲都會派o架啦！（新婚派利是感覺唔同？）私人問題唔講喇！留番下次開記者會先講！（要開記者會咁大件事？）梗係啦！」對於張可頤臨陣易角，Maggie直言外間不乏工作機會，自己亦推掉不少電影及劇集才能參演《大》劇。談到劇集《天與地》遭內地禁播，有份演出的她指內地觀眾可找朋友代錄：「呢啲控制唔到，總之想睇嘅一定有辦法。」

至於「慈禧」一角失而復得，米雪說：「好彩劇組延遲咗先拍得番，今次都推咗好多劇就檔期。（損失好多？）冇計嘅！傾緊後面嗰啲（劇）喇！（內地拍劇舒服啲？）兩地模式唔同，今次返嚟當抖吓！」祥仔則笑言已「閹乾閹淨」演李蓮英：「今次嘅角色唔係忠奸分明，非一般宮廷鬥爭戲，而係講李蓮英點喺清宮生存。」