大贏家祖兒Eason 向新城發炮

《新城勁爆頒獎禮2011》前晚完騷後舉行慶功宴，雖然一眾歌手畀面撐場，但身為大贏家的陳奕迅及容祖兒竟在慶功宴上先後批評頒獎禮的安排！

前晚舉行的《新城勁爆頒獎禮2011》，賽果可謂皆大歡喜，但在慶功宴上，身為大贏家的陳奕迅（Eason）及容祖兒卻先後批評大會。Eason於尾聲獻唱《六月飛霜》時，在升高的舞台上不時搖擺身軀，舞台搖搖欲墜。他在慶功宴上說：「綵排時唔郁，個台都已經搖搖吓，應該用四腳台，唔應該用叉形台，我明香港做嘢趕，但細緻嘢都好緊要！」Eason亦曾問工作人員舞台是否安全：「佢話安全，咁高空踩鋼線都安全o架，都覺自己有少少寸，但嗰下忍唔住！同番佢講對唔住，但佢應該好忙，唔得閒睇。」他認為小事都會影響歌手集中力，暗寸新城做事不夠細心及安全。此外，Eason表示收到好友楊千嬅的訊息，指相識16年但從未見過他於台上如此認真，令她感動，不過Eason表示不知對方是否懷孕。

阿Sa否認吸三千萬

另外，祖兒及何韻詩的緋聞亦被擺上枱，大會刻意安排兩人企隔籬及一起坐，祖兒說：「不外乎呢啲搞氣氛，但唔Work，觀眾覺得呢啲橋段唔新鮮！」暗寸新城借緋聞造勢但不管用。至於有網友踢爆她到阿詩家中開派對，她說：「我唔想講冇，但厭倦呢個話題。」再度奪得「全球勁爆女歌手」的她說：「呢個世界有付出就有收穫！」組合Twins亦奪四獎，蔡卓妍（阿Sa）表示感恩，提到有指她今年吸金三千萬人民幣，她說：「假o架！」至於Amusic旗下歌手食白果，新城娛樂及製作總經理朱明銳說：「係佢哋自己放棄競逐。」