李彩華請私人保安巡樓

藝人紛紛北上掘金，部分曾遇上內地治安問題造成人身和財物威脅，當中李彩華和杜汶澤各有自保方法！李彩華說：「近年太多酒店保安問題，依家我會自聘保安人員喺酒店樓層看守，防止陌生人嚟我房，貴重嘢會放喺房內夾萬，床頭仲會有個對講機，直接聯絡到樓層保安、鄰房化妝師同助手，有咩事都有照應。」而杜汶澤驚聞江若琳被爆竊：「江若琳都係黑仔㗎嘞！我身為學武之人比較安全，但我返內地工作都好少帶貴重嘢，財物都會放喺夾萬，如果冇夾萬就會放晒喺背包，背包就跟身放喺床頭！」

同樣要到內地開工的鄧麗欣說：「習慣一個人住，一定會鎖好房門，落晒防盜鏈，返內地工作盡量唔會帶太多錢或者貴重財物。」而方力申則說：「香港住所都試過被賊仔爆竊，我同個賊仲面對面添！返內地拍嘢要好小心門房，自身安全最重要！」至於薛凱琪以往到內地工作，通常有兩個助手陪同，由於她怕黑又驚一個人瞓，助手會輪流陪她睡：「喺內地有時住啲荒山野嶺嘅地方都冇法，住酒店都試過門鎖壞，又試過用錯鎖匙都開到門，女仔盡量搵人陪瞓。」