嘉桓浩民狼吻夜驚魂

內險股埋年發「盈警」

咪以為係內地保險股，實質一啲都唔保險，在內地搵食，即使收工鬆一鬆，分分鐘仲驚險兼凶險！雖謂詠春寸勁厲害無比，但放軟手腳一樣無用武之地。睇睇宅男女神空有詠春黐手，依然歷險重重。埋年發「盈警」，一來警醒女神，今後要保持清醒，仲要識Say No；二來警醒嗰啲醉男要醒定，咪再手多多口又疏，否則形象插水，悔不當初。

壞消息拖累 陳浩民終極拆彈

008內險股

代表：陳浩民、馬德鐘、陳嘉桓

審大師狠批：

內險股不利因素無法消弭，年年梗有單。陳浩民與馬德鐘轉投紅籌板塊，好好的北上發展，可惜神州大地（今年開橫店呢瓣）苦悶難當，不是瞓覺唱K，就是吃串燒解悶。難得半新股陳嘉桓北上拍戲，浩民德鐘秉承好客之道，令陳小妹不勝好客之手上下挪移，淚灑橫店，還漏夜返港，再開記招後報警。

事件鬧大，馬小生急搵樂易玲救亡終拆掂局，相反陳小生股價急跌，利淡消息拖累下，惟有拖住大肚老婆開貓紙記招，涕淚交流，其後老婆生B沖喜，陳小生再登報道歉，聲言捐款，連番奔走拆彈，終亦為嘉桓與其師冼國林原諒，總算止跌回升，惟埋年又爆出「捐款門」事件，再受衝擊，民望乃上落市格局。