甄詠珊陳啟泰向無綫宣戰

甄詠珊及陳啟泰最近合作主持亞視男女速配節目《撻著》，甄詠珊表示相睇可減少受騙機會，阿泰則對節目充滿信心，更挑戰無綫，歡迎對方抄橋對撼！

內地速配節目不時引起城中熱話，亞視最近亦照辦煮碗炮製節目《撻著》，並由前Freeze成員甄詠珊（Carisa）及陳啟泰主持，兩人首次合作已充滿默契，阿泰說：「我哋一個用腦，一個用心，火花幾好！」他笑言得知無綫將製作類似節目，歡迎對家「抄橋」：「之前全靠隔籬台令《百萬富翁》更成功，我唔怕佢哋抄，製造到社會話題仲好！」

女參賽者大膽敢言

Carisa表示一直有追看內地速配節目，有時比參賽者更肉緊，故知道有廣東話版後十分興奮，又指速配勢成潮流，而且比網上交友安全，故會鼓勵身邊美女參加：「網上不時發生騙案，反而節目入面，大家真正接觸到對方，好返璞歸真！」

阿泰亦認為相睇非壞事，而且節目有專家分析，可令參賽者更清楚自己需要：「姑勿論追唔追到女仔，佢哋都會對自己了解咗，受用不淺o架！」問到會否怕香港觀眾較怕醜？阿泰表示起初也有此擔心，但後來發現時下男女相當敢言，Carisa說：「佢哋唔鍾意就會話對方唔得，有個女仔仲讚個男仔Pat Pat有肉，好直接！」

主持經驗不多的Carisa自覺轉數仍未夠快，坦言從阿泰身上獲益良多，阿泰則大讚她有潛質：「佢表面上好斯文，但原來好多Gag，我鼓勵佢搞多啲Gag o架！」