周家怡搵阿佘急救普通話

剛轉投新經理人公司的前無綫藝員周家怡，為應付內地市場，專誠搵老師惡補普通話！她笑言老友佘詩曼適應能力強，不時向對方取經！

周家怡與好姊妹佘詩曼（阿佘）以往有影皆雙，如今阿佘北上發展，家怡當然伴隨左右，雖然明年才為劇集開工，但家怡預料屆時要應付大量普通話，所以一早找老師上堂糾正發音，另一邊廂又向阿佘取經，希望雙管齊下獲得更大成效。

自言天生脷短的家怡，自小已有懶音問題：「以前唔覺自己有問題，因為父母呢方面好嚴重，依家好啲，改善後講普通話都會正啲！（搵阿佘教？）佢好勁、好聰明！拍劇有啲演員照講廣東話，佢就講普通話，所以進步神速，有時叫佢講兩句我聽，真係進步咗好多，我要向佢好好學習！」

最憎揀禮物

外表似Wet妹的家怡，原來節日也不會大事慶祝，大多只約身邊友人聚會：「我從來都唔會去外面搞派對，多數喺朋友屋企舉行！抽禮物呢家嘢好煩，驚買到唔啱人心意，有時自己抽到唔啱心水又唔知點，咁不如唔好搞！其實同朋友坐埋傾偈咪仲好，節日根本係藉口啫！」