楊梓瑤：我敢愛敢認

要在娛樂圈交朋結友說易行難，對於性格被動內向的楊梓瑤（Carol）就更添難度。Carol表示雖然在娛樂圈工作，但甚少與圈中藝人接觸，因她試過被朋友出賣，故交友時會更謹慎。

口述：楊梓瑤　筆錄：專案組

我由大學生身份變成模，再做藝人，雖然影寫真或拍戲都唔介意性感，但唔等如我熱情開放。其實啱啱相反，我本身性格被動內向，所以拍咗幾部電影，雖然識咗唔少圈中人，但圈中朋友着實唔算多，因為做嘢還做嘢，我冇同佢哋交換聯絡方法，就算係合作過嘅羅仲謙，都冇Contact，反而模特兒公司啲朋友比較多。

合作後各散東西　

點解我揀朋友咁小心？因為試過畀朋友出賣，嗰時覺得好嬲好委屈，我係敢愛敢認嘅人，邊啲先係真心朋友、可以同你共患難，我會睇得好清楚，好似當你好Stressful（壓力大）嗰陣，有人可以喺你身邊完全冇離開，當情況轉好呢，有啲人又識返嚟搵你。試過之前拍戲，成班人一齊玩，仲喺微博互相關注，但當部戲拍晒落埋畫，有啲人就會即刻取消關注，亦唔會幫你手轉發一啲訊息，因為擔心好似幫緊你宣傳，所以喺呢行我會好小心揀朋友。

不過我都有圈外知心朋友，好似之前同男朋友散咗，我就打畀佢哋傾心事，仲會撲出嚟陪我。講真以前唔識諗，成日麻煩朋友，但佢哋同我由細玩到大，識咗十幾年，所以依家我好珍惜友情。

後記

楊梓瑤出道日子雖然不算短，但所經歷的負面報道卻層出不窮，較其他出道多年的藝人多，這些報道一度令Carol吃不消，但其EQ甚高，懂得找人開解，以及絕不鑽牛角尖，而她接受筆者訪問時，常流露真性情，有話直說，認真襟撈！