娥姐例遲犯眾憎 張兆輝扯火告發

商天娥拍攝新劇時被指因遲到辣慶張兆輝，更連「媽咪」雪妮亦因受不了其脾氣而要求監製「賜死」，昨日她與輝哥出席活動時全程零交流，唔啱到出面！

屢被指專橫霸道的商天娥，最近拍攝處境喜劇《結‧分@謊情式》再因例遲辣慶「老公」張兆輝，劇組人員雖以「不同枱食飯」示警，但她日前排戲時仍遲足一個鐘，令輝哥嬲爆致電監製關永忠到場「攤牌」。據知，監製到場時即質問是誰遲到，剛「蒲頭」的娥姐只好承認遲到，台前幕後事後無不拍手狂讚輝哥夠薑！除了激嬲「老公」外，「媽咪」雪妮亦受不了其脾氣，憤而向監製要求「賜死」自己。

承諾不再犯

被指犯眾憎的娥姐，昨日與輝哥及湯盈盈等宣傳《結》劇，傳不和的「輝娥」全程面左左，就算與女兒同行仍未能令輝哥一展歡顏。身為主角的他刻意與娥姐企到離行離列，即使被其他演員拉回中間排排企，仍保持一個身位距離。全程幾乎笑容欠奉的他與娥姐即使站在一起都依然與對方保持距離兼冇偈傾。

輝哥接受電話訪問時坦言娥姐性格「好直」，更多次強調準時的重要性：「自己就冇嘢，只希望往後順利就算！演員遲到應該由高層處理！我有同監製傾過，希望所有人都準時啦！」而娥姐透過電話否認遲到：「今日（昨日）做冬喎！唔好傳呢啲嘢，我哋相處好融洽！」此外，監製透露娥姐已承諾不會「再犯」：「其實佢嗰日一早返咗嚟，但上咗公司八樓攞支票，可能同人傾多咗先遲咗落廠！」並指毋須為是非改劇本：「佢哋表現好專業。」