Cammi Nelson餅印碰頭　 莊思敏寸爆似外星人

學生o靚模謝芷蕙（Cammi）爆出親密照後，昨日首度復工，大會安排與她如餅印的Nelson同台，同場的莊思敏笑說：「今日啲人樣好怪，我以為去咗Pandora星。」

自親密照事件後，Cammi形象雖然變得負面，仍有數十龍友帶備長鏡頭及拉橫額支持，但難逃被張學潤（Nel Nel）及莊思敏開咪教訓，Cammi認低威說：「多謝Nel Nel教識我好多嘢，佢啱，我係冇戴超誇張大眼仔，但都係有戴大眼仔。（莊思敏話你表達能力差？）我唔識講嘢，會改善。（床照事件有冇唔開心？）冇乜嘢，過咗去唔講，總之我唔會出書寫情史。（聖誕約男仔玩？）約咗女性朋友慶祝，我會聽Nel Nel忠告，安全地玩。」

溝通唔到

莊思敏坦言與Cammi冇偈傾：「佢表達能力有問題，讀多啲書先。係我衰，貪得意接呢個Job，想睇Nel Nel同Cammi係咪真係咁似，嚟到覺得今日啲人樣好怪，我以為去咗Pandora星（《阿凡達》）。」Nel Nel則說：「Cammi係天真小妹妹，我有叫佢帶眼識人，要慎言，唔好咁易畀男人呃。（契佢做女？）唔使咁嚴重，了解吓先，我鍾意幫新人，有事可以搵我。」