郭羨妮佗B係咁嘔：嚴重到標冷汗

前港姐冠軍郭羨妮剛於十月與內地武指朱少杰結婚，婚後即成功懷孕，她坦言「開心事」比預期中來得快，故在專訪中首度開腔談懷孕三個月的感覺。

郭羨妮（Sonija）對結婚生仔的念頭未有太大落實，但幸福到來，結婚到生仔這個程序又是很自然的事，故她認為是安排有序，談及早前郭母催婚，她說：「阿媽話：『阿女你年紀唔細，如果唔生，人生好似欠缺咗一啲精彩，出年你就38歲，如果仲想生BB就要快啦！』而我真係有咗BB，準備做母親嘅感覺好得意！（生幾多個？）冇諗，等BB出世再算，因為未知做媽媽係點，亦唔知自己係咪可以應付！（老公呢？）佢想我生多幾個，佢最想生女，佢話生女會黐爸爸，咁我問佢如果係仔呢？佢話仔都鍾意，我就冇乜所謂，女可以幫佢扮靚，仔將來可以保護我。」

驗出有喜時，朱少杰不在港，Sonija只好電話報喜，當時丈夫開心不已，問到沒有丈夫在身邊照顧有否不慣？她說：「初初懷孕時，都有好多唔舒服，成日嘔好辛苦，又好怕去啲嘈嘅地方，個人會好敏感，如果逗留喺一個嘈吵地方，我係會嚴重到標冷汗！又唔知係咪賀爾蒙影響，有咗BB後好冇耐性，好在我胃口好，特別鍾意食酸嘢同鹹嘢，雖然老公因為工作長期喺內地，但好在有媽咪照顧我，成日煲湯畀我。」

為BB賺少百萬

最近常在北京拍新劇的朱少杰，完成工作後會來港接老婆Sonija到內地過新年，問到生完BB後會否繼續工作？她說：「有咗之後已經推咗幾套劇，損失咗7位數字，其中一套要做打女！（同老公分隔兩地怕唔怕影響感情？）又唔驚喎！兩個人相處信任好重要。」