羽翹升呢女強人望蜚聲國際

唱歌出身的羽翹來年開行Turbo強攻電影及主持界,向來化妝神乎其技的她,亦將推出個人化妝品牌,自資創業做女強人,誓要打造自己成為新一代「周身刀,張張利」的全能藝人!

奧林匹克運動會有「十項全能」考驗運動員的體能極限,想不到現在就算當藝人都要文武雙全,琴棋書畫樣樣皆精,歌手羽翹來年向自己下戰書,立志要在影壇、主持界及商界打出名堂。為了更有效履行承諾,跟公司再簽約五年的她,加了多項新規條來鞭策自己:「今次續約去咗人生另一階段,先小人後君子咁加咗啲嘢,包括要年年出碟,同埋會參與公司電影。」其公司來年會開拍多齣電影,她暫時已知在《3D紫荊俠》飾演一角,破格演醜角:「我會做一個發明家,不修邊幅嘅醜女,應該會幾好笑,有少少似羅家英喺《國產凌凌漆》入面個達聞西角色,所以會向佢偷師!」

拜師祖藍學戲

羽翹之前多數在電影中客串路人甲,為了預備即將參演的電影,她要認真鑽研,原來她中學時跟過搞笑大師王祖藍學演戲:「今時今日如果覺得我演技有問題,就唔好問點解!」但祖藍近來忙於拍劇及電影,她亦不好意思打攪對方,但不忘大讚祖藍是名副其實的良師:「有次我把聲沙咗,我問佢有咩方法解決,佢一直都冇聽我電話,我以為佢唔記得咗,點知後來佢Send咗個好詳細嘅短訊畀我,係佢睇開嘅醫生個電話同地址,仲有晒講解,令我好感動!」舞台劇演員彭秀慧亦是她一直很欣賞的演員,希望可找她教演戲,可惜一直夾不到時間。

玩棟篤笑化妝

向來有「YouTube美容女王」之稱的羽翹,因在網上上載化妝短片而受眾姊妹青睞,現在很多商場邀請她出騷,除要求唱歌及彈琴外,還要附加一個額外表演—即席化妝!但為防悶場,她要不時即席棟篤笑,事前毫無準備的她每次都打天才波:「你幫個模特兒化妝唔講嘢會好悶,所以我就要不停講嘢,好似少林功夫加唱歌跳舞咁!」她跟同樣愛化妝的傅穎經常交換心得,從對方身上學懂堅持:「佢比我更堅持每次出席公開場合要自己化妝,每次佢幫雜誌報紙影完相,都會落番自己個名做Credit,以後我都會咁做!」

對化妝有獨門技巧的羽翹,不滿足於出騷或上載短片,她希望以自己的名字成立化妝品牌,開網頁介紹最新消息之餘,亦會研發化妝用具:「到時個品牌會同我本化妝書一齊出,自己事事都會跟到足,會出化妝掃,搵最好嘅毛做!」她背後並無財團或有錢仔撐腰,全部自資,坦言做生意興趣比賺錢更重要:「價錢會大眾化,盡量唔會賺好多,想教啲姊妹化妝品唔係貴就好,唔好次次都淨係識睇名牌!」其品牌會保持高透明度,她希望以女強人姿態做好品牌,有日可打入國際,為華人爭光!

後記:戀情臨門撻Q

讀女校的羽翹,入行後認識不少異性,奈何每次差一步成為戀人前都撻Q:「你揀人、人揀你,遇到幾個好重要嘅人,但每次去唔到拍拖個位,曖昧得太耐就放棄!」被視為其男友的羅力威,在她口中也只是好朋友!

化妝:羽翹@avaliu.com

服裝:SingleLifeDS

髮型:Jay Yeung@Hair Corner

韋芷茵

羽翹渴望推出個人化妝品牌,可打入國際市場。

羽翹表示做生意興趣比賺錢重要,望以大眾化價錢省靚招牌。

曾推出寫真的羽翹,出碟又拍戲,向全能藝人之路進發。

羽翹經常獲邀示範化妝,為防悶場,更即席表演棟篤笑。

由莊思敏(左二)及羽翹(左三)主持的《姊妹淘》,與女藝人分享化妝心得。

將在新片中破格演醜角的羽翹(右一),曾向王祖藍學做戲。