湯盈盈停牌坐司機位
無綫藝員湯盈盈於09年醉駕停牌期間，偷雞為無綫劇集《天與地》拍揸車戲！盈盈與《天》劇監製戚其義（阿戚）昨日解釋事件，阿戚指當日盈盈揸車鏡頭是用拖架拍攝，以及用人手將冇啟動引擎的車推郁，畫面未見人推車是用後期技術「執走」。而盈盈則表示不擔心被追究：「停牌後我冇揸車，私下都冇！（警方有冇聯絡你？）都冇！」阿戚雖解釋人手推車，但常理一部沒有啟動引擎的車並不容易用人手將之推前推後甚至泊位，更有指盈盈於停牌期間坐上司機位已觸犯法例，律師梁永鏗說：「停牌者一旦坐上司機位，不論喺公眾或私人地方，即使冇開動引擎都已觸犯法例，初犯者最高刑罰監禁3個月及罰款5千元！」
湯盈盈與戚其義（左）解釋當日拍攝「揸車戲」經過。