杏兒與Bosco凹凸配：真係好幸福

出爐雙料視后胡杏兒在無綫頒獎禮上發表「互頂」宣言，正式公開與黃宗澤的戀情，她接受本報專訪時大讚男友樂觀兼有「煮」意，更冧爆說：「身邊有個咁嘅人，又真係好幸福嘅！」認真甜到漏！

入行12年的99年港姐季軍胡杏兒開齋封視后，洗脫「囧」名，向來低調談情的她，毅然在頒獎台上公開答謝男友黃宗澤（Bosco），其「互頂」宣言成為一時佳話！雖然戀火燒得正盛，但面對新鮮熱辣的視后獎座，杏兒仍理性地表示得獎與結婚是兩回事：「咁快結婚，我就要做媽媽角色，我仲想同好多好戲之人合作，好似雯女鄧萃雯呀！所以慢慢先啦！」

唔介意「短」

問到二人到底有多「難頂」，杏兒擺自己上枱護愛郎：「我係悲觀主義者，做所有事或對人哋嘅說話都比較認真，又情緒化！我知係難頂，但做演員要多愁善感，因為演員本身都係Short Short哋！」至於男友的「短處」，她笑言只有脷短：「男仔脷短唔緊要，有其他長處咪得囉！佢份人樂觀，演戲又好，工作一路都好努力，雖然佢個樣畀人覺得係唔努力，但其實相反！」她笑言與男友一凹一凸，毋須「夾死烏蠅」！

下廚靠男友

除了性格樂天，杏兒又大讚Bosco廚藝了得：「佢就算煮罐頭湯都話要加配料，連油鹽水蜆都難唔到佢，因為佢細個喺大牌檔學過，相對我就好皮毛，所以我永遠入唔到佢個廚房。有時我覺得自己好冇用、好冇癮，惟有喺廚房門口行番出去！不過，話就話冇癮，但身邊有個咁嘅人，又真係好幸福嘅！」